पौडलया उम्मेदवारी लित कायेगु निर्णय
झिंन्हय्क्वःगु प्रधानमन्त्रीया निर्वाचनय् बुइगु निश्चित जुइवं नेपाली काङ्ग्रेसं रामचन्द्र पौडेलया उम्मेदवारी लित कायेगु निर्णय याःगु दु ।
एकीकृत नेकपा (माओवादी) व नेकपा (एमालें) प्रधानमन्त्रीया छम्ह जक उम्मेदवार रामचन्द्र पौडेलया विपक्षय् मतदान याइगु जुइवं काङ्ग्रेसं उम्मेदवारी लित कायेगु निर्णय याःगु खः ।
थ्वस्वयां न्ह्यः उम्मेदवारी लित कायेगु विषयलय् औपचारिक निर्णय यायेत संविधानसभा भवन न्हू बानेश्वरय् काङ्ग्रेस केन्द्रीय समितिया आकस्मिक मुँज्या च्वंगु खःसा थःगु पक्षय् बहुमत मवइगु निश्चित जुइवं काङ्ग्रेसं थौंया प्रधानमन्त्री निर्वाचन स्थगित यायेत सभामुख सुवास नेम्वाङयात इनाप नापं याःगु खः ।
काङ्ग्रेसया इनापय् एमाले बाहेक सरकार समर्थित दलतय्सं समर्थन क्यंगु खः । थौं हे संविधानसभा भवनय् च्वंगु मू स्वंगू दलया मुँज्याय् काङ्ग्रेसं निर्वाचन चीकेत याःगु प्रस्ताव माओवादी व एमालें अस्वीकार याःगु खः ।
