प्रधानमन्त्रीया निर्वाचन लिछ्यायेत कांग्रेसया इनाप
नेपाली कांग्रेसं बुधवाः जुइगु प्रधानमन्त्रीया निर्वाचन छन्हु लिछ्यायेत इनाप याःगु दु ।
बुधवाः सुथय् च्वंगु कांग्रेस नेतातय् मुँज्यां प्रधानमन्त्रीया उम्मेदवार रामचन्द्र पौडेलया उम्मेदवारी लितकायेगु विषयलय् सहलह यायेत ई माःगुलिं थौंया निर्वाचन लिछ्यायेत सभामुखयात इनाप यायेगु निर्णय याःगु खः ।
कांग्रेसया अनौपचारीक मुँज्यां पौडेलया उम्मेदवारी लितकायेगु वा मकायेगु बारे पार्टीया केन्द्रीय समितिं निर्णय यायेमाःगुलिं उकीयात ई माःगु धाःगु दु । कांग्रेसं पार्टीया केन्द्रीया मुँज्या कन्हय् सुथय् सःतुगु दु ।
नापं कांग्रेसं पौडेलया उम्मेदवारी लितकायेगु बारे मेमेगू दलत नाप सहलह यायेगु निर्णय नं याःगु दु । थौं सुथय् जक कांग्रेसं एमालेया वरिष्ठ नेता नापं प्रधानमन्त्री माधवकुमार नेपाल व केपी शर्मा ओलीयात नापलाःगु खः ।
नापलाय् ज्या एमाले नेतातय्सं पौडेलयात उम्मेदवारी लितकायेगु इनाप याःगु खः । एमाले नेतातय्सं पौडेलं उम्मेदवारी लितकासाः न्हूगु प्रक्रिया सुरु जुइगु व आः कांग्रेसं दकलय् न्हापां नेतृत्व याइगु कथं चक्रिय प्रणाली नालफइगु खँ धाःगु खः ।
