ल्यानग्रेन नापलाय् ज्याय् व्यस्त
नेपाः स्थित राष्ट्रसंघीय राजनीतिक मिसन अनमिनया म्याद छुं दिं जक ल्यं दुगु इलय् अनमिन प्रमुख करिन ल्यानग्रेन राजनीतिक दलया नेतात नापलाय् ज्याय् व्यस्त जुयादीगु दु ।
अनमिन प्रमुख ल्यानग्रेनं थौं सभामुख सुभाषचन्द्र नेम्वाङयात नापलाना खँल्हाबंला यानादीगु दु । नापलाय् ज्याय् सभामुख नेम्वाङं थःगु कार्यकालया दुने अनमिनं नेपालय् सफलतापूर्वक ज्या याःगु धासें सुभाय् बियादीगु खः ।
उगु इलय् अनमिन प्रमुख ल्यानग्रेनं अनमिन लिहांवनेधुंकाः जूसां नेपाःया शान्ति प्रक्रिया क्वचाइगु व लडाकुतय् व्यवस्थापन व समायोजन याकनं जुइगु विश्वास प्वंकादीगु खः ।
थौं हे ल्यनग्रेनं एनेकपा (माओवादी)या न्वकू डा. बाबुराम भट्टराईयात नं नापलानादीगु दु । भट्टराई निवास सानेपा थ्यंका ल्यानग्रेनं आःया हे अवस्थाय् अनमिनया म्याद थप यायेमफइगु धयादीगु खः ।
नापलाय् ज्या नेता भट्टराईं शान्ति प्रक्रिया अझ नं क्वमचाःगु धासें अनमिनया आवश्यकता अझ नं दुगु धयादीगु खः । वय्कलं अनमिन लिहावंसां राष्ट्रसंघ छुं नं कथंया उपस्थित जूसाः शान्ति प्रक्रियाय् ग्वाहालि जुइगु बिचाः प्वंकादीगु खः ।
