माओवादी व कांग्रेसया शीर्ष नेतापिनिगु बैठक निर्णय विहीन
एकीकृत नेकपा (माओवादी) व नेपाली कांग्रेसया शीर्ष नेतापिनिगु थौं च्वंगु बैठक ठोस निर्णय बिना हे क्वचाःगु दु । एमाओवादी संसदीय दलया ज्याकू सिंहदरबारय् च्वंगु उगु बैठकय् प्रधानमन्त्रीया नितिं चक्रीय प्रणालीइ वनेमाःगु निगुलिं पार्टी सहमत जूसां नं सरकारया नेतृत्व सुनां न्हापा यायेगु धइगु विषयलय् सहमति जुइमफूगु खः ।
बैठकलिपा सञ्चारकःमिपिंलिसे खँल्हानादिसें कांग्रेस संसदीय दलया नेता रामचन्द्र पौडेलं चक्रीय प्रणालीइ वनेत निगुलिं दल सहमत जूगु जानकारी बियादिसें संविधानसभाया निर्वाचनलिपाया देय्या राजनीतिक घटनाक्रमयात दृष्टिगत यानाः सरकारया नेतृत्व न्हापां कांग्रेसं यायेदयेमाःगु बिचाः तयादिल । अथेहे एमाओवादी संसदीय दलया उपनेता नारायणकाजी श्रेष्ठं प्रधानमन्त्रीया उम्मेदवारी लित कयाः न्हूगु शिरापाखें राष्ट्रिय सहमतिया आधारय् सरकार नीस्वनेत कांग्रेसयात इनाप याःगु धयादिल ।
