निगू महासंघदथुइ मैत्रीपूर्ण नापलाये ज्या क्वचाल

अखिल नेपाल ट्रेड युनियन महासंघ ANTUF व अन्तर्राष्ट्रिय ट्रेड युनियन Confidaretion OTUC एशिया प्यासिफिकया प्रतिनिधिदथुइ थौं निगू पक्षिय स्वापूयात सुधार यानाः यंकेगु विषयसं सहलह जूगु दु । आईटियुसीया मू छ्याञ्जे नोरियुकि सुजुकी व अन्टुफया प्रतिनिधिया दथुइ जूगु न सहलहया दथुइ नेपाःया राजनैतिक स्थिति, नेपाली ट्रेड युनियन आन्दोलनया वर्तमान अवस्था, नेपाःया श्रम बजाःया अवस्था, राष्ट्रिय मजदूर आयोग नीस्वनेगु, सामाजिक सुरक्षायाबारे विकास जुयाच्वंगु अवधारणा लिसे न्हूगु संविधानय् मजदूर अधिकारया विषयसं सहलह जूगु अखिल नेपाल टे्रड युनियन महासंघया मू छ्याञ्जे गणेश रेग्मीं जानकारी बियादिल ।

सहलहसं अखिल नेपाल ट्रेड युनियन महासंघया प्रतिनिधितय्सं एशियाली विकास बैंक व विश्व बैंकं मजदूरया सामाजिक सुरक्षाय् लगानी यायेत व ध्यान बिइगु नितिं आइटियुसिं लबिङ्ग यायेमाःगुलिइ बहः ब्यूगु दु । आईटियुसीया मू छ्याञ्जे सुजुकीं धाःसा उखेपाखे कुतः जुयाच्वंगु व थ्व नापलाये ज्यां थःत न्हूगु अनुभूति ब्यूगु जानकारी ब्यूगु खः । महासंघया केन्द्रीय ज्याकू पेरिसडाँडाय् जूगु उगु नापलाये ज्याय् ल्यू मू छ्याञ्जे जगत सिम्खडा व ज्याकू छ्याञ्जे लिसे मिसा विभाग ल्यू कजि उषा देवकोटा लगायतपिनिगु ब्वति दुगु खः ।