थिनंनिसें माओवादीपाखें संसदय् हंगामा
येँ सन्ध्या टाइम्स÷सरकार त्वःते सातकि नेकपा माओवादीं राष्ट्रपतिया पलाः संशोधन याकेगु लािगं तःधंगु आन्दोलन यायेगु तयारी शुरु याःगु दु । उकिया न्हापांगु ज्याझ्वः कथं थिनंनिसें हे संसद अवरुद्ध यायेगु ग्वसाः न्ह्यःने हःगु दु ।
थौं सुथय् च्वंगु माओवादी संसदीय दलया बैठकं राष्ट्रपतिया पलाः संशोधन मयाःतले संसद हे चले मयाकेगु निर्णय याःगु दु । माओवादी सभासद्तय्सं संसदय् हंगामा यानाः राष्ट्रपतिया पलाःया विरोध यायेगु ज्याझ्वः दयेकूगु दु ।
उकुन्हुंनिसें संसदय् नेपाली कांग्रेसं हंगामा याना वयाच्वंगु खःसा आः माओवादीं याइगु जूगु दु ।
सूत्रतय्सं बिउगु जानकारी कथं माओ-वादीं आः सतक आन्दोलन नं अतिकं तीव्र याइगु मनःस्थिति दयेकूगु दु । माओवादीं फयाफछि न्हूम्ह सरकारयात प्रधानसेनापति हटे मयासें मगाःगु स्थितिइ तक हयेगु कथंया आन्दोलन सिर्जना यायेगु तयारी यानाच्वंगु खँ नं सूत्रं धाःगु दु । माओवादी आन्दोलन लिपा देय् हानं अस्तव्यस्त जुइगु अनुमान देय्न्यंकं जुयाच्वंगु दु ।
