पौडेलया विपक्षय् मतदान यायेत ह्वीप जारी
नेकपा एमाले संसदीय दलं प्रधानमन्त्रीया छम्ह जक उम्मेदवार नेपाली कांग्रेसया नेता रामचन्द्र पौडेलया विपक्षय् मतदान यायेत थः सभासदतय्त ह्वीप जारी याःगु दु ।
एमाले संसदीय दलया प्रमखु सचेतक भीम आचार्यं पितबिउगु प्रेस विज्ञप्तीइ कन्हय् जुइगु प्रधानमन्त्री ल्यज्याय् उम्मेदवार जुयाच्वनादीम्ह रामचन्द्र पौडेलं थःगु उम्मेदवारी लित मकासे भोत कुर्केमाःगु अवस्था ब्वलन धाःसा पौडेलया विपक्षय् मतदान यायेत थः सभासदतय्त निर्देशन बिउगु दु ।
एमाले संसदीय दलया निर्णय केन्द्रीय कमिटिया निर्णय कथं जूगुलिं पौडेलया विपक्षय् मत कुर्केत दक्व सभासदतय्त निर्देशन बिउगु उगु विज्ञप्तीइ न्ह्यथनातःगु दु ।
थ्वहे झ्वलय् प्रधानमन्त्रीया ल्यज्या जुइगु छन्हु न्ह्यः सरकारया नेतृत्वयात कयाः एमाले दुने गम्भिर मतभेद शुरु जूगु दु ।
प्रधानमन्त्रीया छम्ह जक उम्मेदवार रामचन्द्र पौडेलया पक्षय् मतदान यायेगु वा मयायेगु विषययात कयाः एमाले दुने मत भिन्नता ब्वलंगु खः ।
थ्वहे दथुइ पौडेलया विपक्षय् मतदान यायेगु केन्द्रीय कमिटी व स्थायी समितिया क्वःछिनायात पुनःविचार यायेगु लागि दबाब बीगु तातुनां पार्टीया शीर्ष नेता नापं प्रधानमन्त्री माधव कुमार नेपाल व प्रभावशाली नेता केपी शर्मा ओली समर्थक नेतातय्गु अलग भेला याःगु दु ।
प्रधानमन्त्री निवास बालुवाटारय् जूगु उगु भेलाय् संस्थापन पक्ष बाहेक मेपिं केन्द्रीय नेतातय्गु उपस्थिति दुगु खँ धाःगु दु ।
