जिगु प्रतिबेदनया गलत व्याख्या जुल : ल्यानग्रेन
नेपाःस्थित अनमिन प्रमुख करिन ल्यानग्रेनं सुरक्षा परिषदय् थःम्हं न्ह्यब्वयाःगु प्रतिवेदनया गलत व्याख्या जूगु खँ धयादीगु दु ।
ल्यानग्रेनं थौं छगू पत्रकार सम्मेलनय् सुरक्षा परिषद्य् थःम्हं नेपाःमि जनताय् 'राष्ट्रपति शासन, माओवादी जनविद्रोह वा सैनिक कू'या त्रास दुगु स्पष्ट यासें उकियात नेपाली सञ्चारमाध्यमं 'अनमिनया ख्याच्वः' धकाः गलत व्याख्या याःगु धयादिल ।
वय्कलं अनमिन लिहांवनेन्ह्यः हे दलतदथुइ चमत्कारिक सहमति जुइगु विश्वास नापं प्वंकादिल । वय्कलं कन्टेनरय् दुगु ल्वाभः सरकारयात लःल्हायेम्वाःगु स्पष्ट यानादील । वय्कलं अनमिन वनेधुंकाः ल्वाभः सरकारयात लःल्हायेमाःगु बाध्यता मदुगु धयादिल ।
ल्यानग्रेन सुरक्षा परिषद्य् लिपांगु प्रतिवेदन न्ह्यःब्वयाः वंगु बहनी जक नेपाः लिहाँ झाःगु खः । राष्ट्रसंघीय मू छ्याञ्जे वान की मुनया विशेष प्रतिनिधिया रुपं बुरुण्डी सरुवा यायेन्ह्यः ल्यानग्रेन माघ २ गते न्यूयोर्क लिहां वनेत्यंगु दु । प्यन्हुलिपा अनमिनया ई क्वचायेत्यंगु खः ।
