'पौडेलं उम्मेदवारी लितमकासाः विपक्षय् मतदान'
व्यवस्थापिका संसदय् २८ गते जुइत्यंगु प्रधानमन्त्रीया निर्वाचन न्ह्यः हे थःगु उम्मेदवारी लित कायेत माओवादी व एमालें कांग्रेस नेता रामचन्द्र पौडेलयात मंकाः इनाप याःगु दु ।
थौं सिंहदरबारय् च्वंगु निगू दलया शीर्ष नेतापिनिगु मुँज्यां पौडेलयात उम्मेदवारी लित कायेत इनाप याःगु खः । निर्वाचनया तिथि तक्क नं पौडेलं उम्मेदवारी लित मकाःसा उकीया विपक्षय् मतदान यानाः बहुमतपाखें अस्वीकृत यायेगु सहमति माओवादी व एमाले दथुइ जूगु दु निगू दलया मुँजया लिपा सञ्चारकःमिपिंलिसे खँल्हाबल्हा यानादिसें माओवादी न्वकु नारायणकाजी श्रेष्ठ 'प्रकाशं' २८ गतेया निर्वाचनय् पौडेलया विपक्षय् मतदान यायेगु सहमति जूगु जानकारी बियादिल ।
अथेहे एमालेया नायः झलनाथ खनालं अनमिनया बहिगर्मनलिपा छु यायेगु धइगु विषयस मुँज्याय् सहलह जूगु जानकारी बियादिल ।
थौंकन्हय् अनमिनं यानाच्वंगु ज्यायात स्वंगू दलया शीर्ष नेतापिनिगु मुँज्या पाखें छगू प्रभावकारी संयन्त्र निर्माण यानाः न्ह्यःने न्ह्यायेत थःम्हं यानाःगु प्रस्ताव माओवादी नायः प्रचण्डं नं स्वीकार यानादीगु जानकारी नं खनालं बियादिल ।
