राष्ट्रिय सहमतिया सरकार गठन यायेगु निर्णय
न्हूगु सरकार गठनया खँय् सहलह यायेत च्वंगु सर्वदलीय बैठकं राष्ट्रिय सहमतिया सरकार देयेकेत आवश्यक पहल यायेगु निर्णय याःगु दु । बैठकं राष्ट्रपतिं ब्यूगु इया दुने न्हूगु सरकार गठन यायेगु क्वछीगु दु ।
सिंहदरबारस्थित राज्य व्यवस्था समितिया ज्याकूथीइ च्वंगु थुगु बैठक सर्वदलीय बैठक धासां संविधानसभाय् दकलय् तधंगु दलया हैसियत दुगु एकिकृत माओवादी व मेगु प्रमुख दल मधेशी जनअधिकार फोरम व नेपाल मजदुर किसान पार्टीं धासाः बैठकय् ब्वति मकाः ।
नीछगू दलं जक ब्वति काःगु बैठक लिपाः एमाले अध्यक्ष झलनाथ खनालं देया वर्तमान परिस्थितियात मध्यनजर यासें राष्ट्रपतिं ब्यूगु इया दुने राष्ट्रिय सहमतिया न्हूगु सरकार गठन जुइगु धयादिल । तर वयेकलं सरकार सुयागु नेतृत्वय् गठन जुइगु धइगु खँय् बैठकय् सहलह मजूगु धयादिल ।
विगतया कमी कमजोरीया पुनरावृत्ती जुइ मबीत ठोस अध्ययनया निंतिं छगू कार्यदल गठन याइगु धयदिल । माओवादीलगायत दक्व दलतय् समान समावेशी तवरं राष्ट्रिय सरकार गठनया कुतया निंतिं पहलया नापं आचारसंहिता नं देयेकीगु धयादिल ।
अथेहे नेपाली कांग्रेसया उपसभापति रामचन्द्र पौडेलं नं संवैधानिक प्रक्रियाअनुरुप शान्ति प्रक्रियायात निश्कर्षय् थ्यंकेत राष्ट्रिय सहमतिया आधारय् न्हूगु सरकार गठन यायेगु निर्णय जूगु धयादिल । वयेकलं कांग्रेसं एमालेया नेतृत्वय् गठन जुइगु सरकारयात समर्थन याइगु धयादिल ।
