सतक त्यलाः दयेकातःगु अनाधिकृत टहरा चीकल
महानगरीय प्रहरीं थनिंनिसें चक्रपथ २५ मिटर जःखःया क्षेत्रय् सवारी साधन दिकेत, निर्माण ज्वलं तयेत व टहरा दयेकाः व्यापार व्यवसाय यायेत पंगः थंगु दु । चक्रपथय् सवारी आवागमन चुस्त दयेकेत प्रहरीं अभियान न्ह्याकूगु जानकारी ब्यूगु दु । थौं प्रहरीं चक्रपथया ११ थासय् ट्राफिक व प्रहरीया मंकाः पुचलं अज्याःगु थासय् पंथ थंगु खः ।
प्रहरीं यलया सातदोबाटो, एकान्तकुना, येँया बालाजु लगायतया थासय् चक्रपथया ग्रीनबेल्ट त्यलाः दयेकातःगु छेँ, टहरा नं थुनाहःगु दु । यलया एकान्तकुनास्थित यातायात व्यवस्था ज्याकू पिने दुगु थ्यंमथ्यं न्यय्गू टहरा थुनेगु ज्या जूगु खः । टहरा थुनेत स्वःगु इलय् व्यापारी व प्रहरीदथुइ छुं ई ल्वापु नापं जूगु खः ।
सतकपाखें २५ मिटर जःखः लागाया अनाधिकृत तवरं दयेकातःगु टहरा थुनेगु ज्यायात अभियानया हे रूपं न्ह्याकूगु महानगरीय प्रहरी प्रभाग सातदोबाटोया प्रहरी निरीक्षक जनार्दन जिसीं धयादिल । चक्रपथ जःखःया अनधिकृतरूपं टहरा दयेकाः सतक त्यलाः व्यवसाय यानाच्वंगु फुक्क टहरा व स्टलया लिसलिसे सवारी पार्किङ चीकेगु अभियान न्ह्याकूगु खः ।
