माओवादी पाखें व्यवस्थापिका संसदया बैठक अवरुद्ध
व्यवस्थापिका संसदया बैठक कार्यसूचीइ प्रवेश मयासें मंगलवाः अबरुद्ध जूगु दु । राष्ट्रपतिया पलाः असंवैधानिक जूगु धासें उकीया खारेजीया माग यासें व्यवस्थापिका संसदया मंगलवाया बैठक माओवादी सभासदतय् विरोध लिपा स्थगित जूगु दु ।
एकीकृत माओवादीं प्रधानसेनापतियात वहाल जुइत राष्ट्रपतिं ब्यूगु निर्देशनया विरुद्ध नारावाजी यासें रोष्टम घेराउ यायेवं बुधवाः तकया निंतिं बैठक स्थगित जूगु खः ।
बैठकया शुरुलय् हे माओवादी संविधानसभा दलका उपनेता नारायणकाजी श्रेष्ठं राष्ट्रपतिं संवैधानिक कु याःगुलिं उकीयात खारेज मयातल्ले माओवादीं संसद सुचारु जुइ मबीगु धयादिल । वयेकलं लोकतन्त्रया निंतिं ल्वापिं दलतय्सं नं ग्वहालि मयागु द्वपं बियादीगु खः । लोकतन्त्रया निंतिं नापं ल्वापिं पार्टी व विदेशी शक्ति केन्द्रं राष्ट्रपतियात थ्व पलाः ल्ह्वनेत तिबः ब्यूगु धयादिल ।
राष्ट्रपतिं छुं नं तरिकां संवैधानिक खः धकाः पुष्टि याये मफइगु कथं पलाः ल्ह्वंगु धासें राष्ट्रपति संविधानया रक्षक जुया नं संविधानया अखः ज्या याःगु धयादिल ।
प्रधानसेनापतियात नियुक्ति यायेगु अधिकार नं राष्ट्रपतिनाप मदुगुलिं थ्व पलाः लितः मकातल्ले माओवादीं संसद अवरूद्ध यानाच्वनीगु चेतावनी बियादिल । सेनापति प्रकरणय् राष्ट्रपसितं द्वैध सत्ता शुरु याःगुलिं जक प्रधानमन्त्रीं राजिनामा बियादीगु धयादिल ।
