२८ दलया बैठक निष्कर्षहिन
येँ (सन्ध्या टाइम्स)/शासकीय स्वरुप व निर्वाचन प्रणालीया विषययात कयाः विवाद जूगुलिं थौं सुथय् च्वंगु २८ दलया बैठक विनानिष्कर्ष क्वचाःगु दु ।
न्हूगु संविधानय् दुथ्याकेगु नितिं विवाद जुयाच्वंगु विषययात कयाः सहमति ब्वलंकेगु नितिं थौं सुथय् सिंहदरवारय् च्वंगु बैठक विना निष्कर्ष क्वचाःगु खः।
शासकीय स्वरुप व निर्वाचन प्रणालीया सवालय् दलयात नेतातय्सं थःथःगु अडान तःगुलिं सहमति जुइ मफुगु खःसा आः लिपा हाकनं बैठक च्वनीगु जूगु दु। बैठकय् ३ प्रतिशत मत हःगु दलयात राष्ट्रिय दलया रुपय् मान्यता बीगु ला कि मबीगु धइगु विषययात कयाः नं बिवाद जूगु खः ।
उच्चस्तरीय राजनीतिक कार्यदलं सहमति ब्वलंके मफुगु ८३ बुँदाय् सहमति ब्वलंकेगु नितिं संविधानसभाया नायः सुवासचन्द्र नेम्वाङया कुतलय् उगु कथं निरन्तर रुपं २८ दलया बैठक च्वनाच्वंगु खः ।
