झापाय् न्हापांखुसी नेपालभाषा बाखं गोष्ठी
झापा (सन्ध्या टाइम्स)/थनया धुलाबारीइ दकलय् न्हापांखुसी नेवाः बाखं मुना ज्याझ्वः जुल। बाखं दबू व नेवाः देय् दबू झापा जिल्ला समन्वय परिषद्या ग्वसालय् म्हिगः उगु ज्याझ्वः जूगु खः।परिषद्या कार्यवाहक अध्यक्ष मय्जु सुन्दर श्रेष्ठया सभापतित्वय् जूगु उगु ज्याझ्वलय् मूपाहां कथं झापाया प्रमुख जिल्ला अधिकारी शशिशेखर श्रेष्ठ, प्रहरीया एसएसपी रविराज श्रेष्ठ व बाखं दबूया नायः लक्ष्मण राजवंशीपिंसं थःथःगु नुगःखँ प्वंकादीगु खः।
स्थानीय झी नेवाः खलःया नायः शरदकुमार जोशीं लसकुस यासें शुरु जूगु उगु ज्याझ्वलय् बाखं दबूया नर्मदेश्वर प्रधानं बाखं दबूया उद्देश्य बारे कनादीगु खः ।
उगु ज्याझ्वलय् न्याम्ह बाखं च्वमिपिं केदार सितु, शशिकला मानन्धर, कृष्णभक्त बोडे, सुनिता महाजु व शरद कसाःपिंसं थःथःपिनि बाखं पाठ यानादीगु खः। अथे हे स्थानीय साहित्यकार अमृतलाल श्रेष्ठं कविता पाठ यानादिल ।
बाखं दबूया नायः लक्ष्मण राजवंशीं थौंकन्हय्या नेवाःतय् अवस्था बारे ध्वाथुइकादिसें थौं नेवाःत मदया वन धाःसां गनं शव्द, गनं संस्कृति, गनं संस्कारया रुपय् नेवाः ल्यना हे च्वंगु दनि धयादिल।ज्याझ्वलय् सांस्कृतिक पुचलं थीथी चचा प्याखं व लोकप्याखं नं न्ह्यब्वःगु खः ।
जेसिजया पुलांम्ह नायः अरुण कुमार श्रेष्ठ मदुगुया छगू मिनेट मौन धारण यासें ज्याझ्वः न्ह्याकूगु खः।
बाखं च्वमिपिनि थ्व पुचः थौं उर्लाबारीइ छगू ज्याझ्वलय् ब्वति कयाः धरान थ्यंकीगु व अन थौ हे बाखं गोष्ठी जुइगु खँ धाःगु दु ।
