नागरिक समाजया धर्नाय् प्रहरी हस्तक्षेप
खुइस्वम्ह प्रदर्शनकारी पक्राउ
प्रधानसेनापति रुक्मांग कटवालयात सरकारं अवकास ब्यूसां राष्ट्रपति डा. रामवरण यादवं पद हे च्वनाच्वनेत ब्यूगु आदेश असंवैधानिक जूगु धासें नागरिक समाजया प्रतिनिधितय्सं राष्ट्रपति निवास सितल निवास पिने ब्यूगु धर्नाय् प्रहरीं हस्तक्षेप यानाः खुइस्वम्ह प्रदर्शनकारी यात ज्वना यंकूगु दु ।
राष्ट्रपति यादवं नागरिक सर्वोच्चताया विरुद्ध संविधानं बियातःगु अधिकार स्वयां पिनेवना थःगु पलाः ल्ह्वंगु धसें नागरिक समाजं धर्ना ब्यूगु खः ।
मंगलवाः सुथय् च्वंगु नागरिक समाजया धर्नाय् प्रहरीं हस्तक्षेप यानाः नागरिक समाजया अगुवात डा. देवेन्द्रराज पाण्डे, कृष्ण पहाडी, श्याम श्रेष्ठ, सुन्दरमणि दिक्षित, खगेन्द्र संग्रैला, मल्ल के. सुन्दर लगायत नागरिक समाजया खुइस्वम्ह प्रदर्शनकारीयात ज्वनाः यंकूगु दु । धर्नाय् डाक्टर, इन्जिनियर, कलाकार आदितय्सं नं ब्वक्ति काःगु खः । ज्वनां यंकूपिंत आः महाराजगंजया प्रहरी ज्याकूथी तयातःगु दु ।
सेनापतियात अवकास बीगु सरकारी निर्णय हिका: राष्ट्रपितं असंवैधानिक महत्वाकांक्षाया निंतिं जनआन्दोलनया भावनाया तकं अपमान याःगु ठहर यासें संविधानया संरक्षणया निंतिं धासें नागरिक आन्दोलनं धर्ना ब्यूगु खः ।
