राजदूत राणायात पदमुक्त यायेत सरकारयात उजं
व्यवस्थापिका संसदया अन्तर्राष्ट्रिय सम्बन्ध व मानव अधिकार समितिं भारतस्थित नेपाली राजदूत रुक्मशमशेर राणायात याकनं पदमुक्त यानाः लितः सःतेत सरकारयात उजं ब्यूगु दु ।
थौं सिंहदरबारय् च्वंगु समितिया बैठकं डाबर नेपालया प्रबन्ध निर्देशक नापं जुयाच्वंम्ह राणायात पदमुक्त यायेत सरकारयात उजं ब्यूगु खः । उगु उद्योगया गैर कानूनी ज्या बारे अख्तियारं छानबिन यानाच्वंगु इलय् राणायात राजदूत थेंज्याःगु पदय् तयाः तयेमज्यूगु समितिया दाबी दु ।
परराष्ट्र मन्त्रालयया छ्याञ्जे मदन भट्टराई लगायतया अधिकारीतलिसे थौं सहसह यायेधुंकाः समितिं राणाया मेमेगु भूमिकाया कारण नैतिक व कानूनीरुपं नं राजदूतय् तयेमज्यूगु लिच्वः पिकाःगु खः ।
थ्वहे दथुइ मदुम्ह ज्याकःमिया क्षतिपूर्ति धेबा थःगु निजी खाताय् तयातःगु साउदी अरबया नितिं नेपाली राजदूत हमिद अन्सारीयात छानबिन यानाः कारबाही यायेत नं समितिं सरकारयात उजं ब्यूगु दु ।
समितिं अनमिनया अनुपस्थितिलिपा देशय् अप्वयेफूगु सम्भावित ल्वापु लिसे मानवअधिकार उल्लंघनया घटनाया विषयसं प्रधानमन्त्री माधवकुमार नेपाललिसे सहलह यायेगु निर्णय याःगु दु ।
