२८ गते प्रधानमन्त्री निर्वाचन
व्यवस्थापिका संसदय् वइगु बुधवाः प्रधानमन्त्री ल्ययेगु नितिं झिंन्हय्क्वःगु खुसिया निर्वाचन जुइगु जूगु दु ।
कार्यव्यवस्था परामर्श समितिया बैठकं वइगु २८ गते बुधबाः प्रधानमन्त्री निर्बाचनया तिथि क्वःछ्यूगु खः । नेपाली कांग्रेसया नेता रामचन्द्र पौडेलया प्रधानमन्त्रीया उम्मेदवारी कायम जुइगु वा मजुइगु धइगु कचवं न्ह्यानाच्वनाः सभामुख सुवास नेम्वाङं व्यवस्थापिका संसदया थौंया बैठकय् प्रधानमन्त्री निर्बाचनया तिथि क्वःछ्यूगु जानकारी बियादीगु खः ।
सभामुख नेम्वाङं मंसिर ३ गते च्वंगु संसदया बैठकय् मंसिर १६ गतेया नितिं प्रधानमन्त्री निर्बाचनया तिथि क्वःछ्यूसां नं न्ह्यानाच्वंगु च्याक्वःगु अधिवेशन क्वचाःगुलिं आधारभुत संवैधानिक दायित्वपाखें ब्यागलं च्वनेमफइगु जूगुलिं विचाराधिन कार्यसूचीयात प्राथमिकताय् तःगु जानकारी बियादिल ।
बुधवाः नं पौडेलया प्रस्ताव ताःमलाःसा निर्बाचनया न्हूगु प्रक्रियाय् वनेमाः । बहुमत सभासद दुगु एकीकृत नेकपा माओवादी व नेकपा एमाले पौडेलया विपक्षय् दुगुलिं उम्मेदवारी लित कायेत कांग्रेसयात दवाब अप्वःगु दु । थ्वहे दथुइ वइगु मंगलबाः न्हिनसिया स्वताः इलय् संविधानसभाया बैठक च्वनीगु जूगु दु ।
