बाखं दबूया थीथी ज्याझ्वः
नेवाः देय् दबू झापा जिल्ला समन्वय समितिपाखें ग्वसाः ग्वःगु बाखं दबू थीथी ज्याझ्वःया प्रमुख जिल्ला अधिकारी शशीशेखर श्रेष्ठं थौ झापाया धुलाबारीइ उलेज्या यानादीगु दु ।
ज्याझ्वःया उलेज्या यानादिसें वय्कलं थःगु जातीय म्हसीकायात ल्यंकाःतय्त नेवाः समुदायपाखें थःगु भाषा व संस्कृतियात परिपालन यायेमाःगु व आधुनिकताय् वनाः ल्वःमंके मज्यूगु बिचाः तयादिल ।
अथेहे ज्याझ्वलय् बाखं दबूया नायः लक्ष्मण राजवंशीं नेवाः जातिइ दुगु मां भाय्, मौलिक लिपि, म्ये, प्याखं व संस्कृतियात ल्यंकाः तय्त परिपालना यायेफूसा झीगु जातीय गौरव तनाः मवनीगु जानकारी बियादिल ।
ज्याझ्वलय् नेपाल भाषाया साहित्यकारत केदार सितु, शशीकला मानन्धर, कृष्णभक्त बोडे, सुजिता सैँजु, शरद कंसाकारं नेपाल भाषाय् बाखं, कवि अमृतलाल श्रेष्ठं नेपाली भाषाय् चिनाखँ ब्वनेगु लिसे मचा कलाकारत विद्या महर्जन, अचला मगर लिसे मन्जली श्रेष्ठ व बुद्धलक्ष्मी महर्जनं कुमारी लिसे मञ्जुश्री प्याखं न्ह्यब्वःगु खः ।
नेवाः देय् दबू झापा जिल्ला समन्वय समितिया कार्यवाहक नायः सुन्दरी श्रेष्ठया सभापतित्वय् जूगु उगु ज्याझ्वलय् झीगु नेवाः खलः धुलाबारीया नायः सनतकुमार जोशी व प्राध्यापक नर्मदेश्वर प्रधानं नेवाः जातिया म्हसीकाया नितिं नेपाल भाषा व संस्कृतियात संरक्षण सम्बर्द्धन यायेमाःगु खँय् नापं बहः बियादीगु खः ।
