न्हूगु सरकारया निंतिं पहल तीव्र
राष्ट्रपति डा. रामवरण यादवं द्वैध सत्ता संचालन यायेत स्वःगु धासें एकीकृत नेकपा (माओवादी)या अध्यक्ष पुष्पकमल दाहालं प्रधानमन्त्री पदपाखें राजीनामा बीवं न्हूगु सरकार देयेकेगु निंतिं माओवादी बाहेकया दलतय् दथुइ सहलह तिव्र रुपं न्ह्याःगु दु । नापं दलत थःथःगु आन्तरीक बैठकय् नं व्यस्थ जूगु दु ।
माओवादी अध्यक्ष प्रचण्डया राजीनामा लिपाः एमालेया नेता माधव कुमार नेपालया नेतृत्वय् राष्ट्रिय सहमतिया सरकार देयेकेत दक्व राजनीतिक दलत दथुइ सहहल जूगु दु । कांग्रेस व एमाले दथुइ सोमवाः च्वंगु मंकाः बैठकं न्हूगु गठबन्धनबारे माओवादी सहितया दलतनाप सहलह याना: न्ह्याः वनेगु निर्णय यायेवं दलत दथुइया सहलह तीव्र रुपं न्ह्याः वंगु दु ।
एमालेया वरिष्ठ नेता माधव कुमार नेपाल व अध्यक्ष झलनाथ खनाल मध्ये सुयात प्रधानमन्त्रीया निंतिं न्ह्यने सारे यायेगु धकाः एमालेया आन्तरीक सहलह नं तीव्र रुपं न्ह्यानाच्वंगु दु । एमालें सरकारया नेतृत्व यासाः सर्वमान्य जुइम्ह व्यक्तियात न्ह्यने सारे याइगु जूगु दु । थौ सिंहदरवारय् च्वनीगु संविधानसभाय् प्रतिनिधित्व याइगु दलतय् बैठकय् एमालें प्रधानमन्त्रीया निंतिं उम्मेदवारया नां घोषणा याइगु ग्वसाः दु ।
कांग्रेसं न्हूगु गठबन्धन सरकारया नेतृत्व एमालें यायेत प्रस्ताव तःगु खः । कांग्रेसं माओवादी समेतया सरकार गठन यायेत सर्वस्वीकार्य व्यक्तिया प्रधानमन्त्रीया कथं न्ह्यने सारे यायेत एमालेयात इनाप याःगु खः । थ्व इनाप लिपा माधव कुमार नेपाल प्रधानमन्त्रीया निंतिं प्रवल दावेदार जुयादीगु दु ।
थ्वहे झ्वलय् एमाले, कांग्रेस, फोरम, तमलोपा, सद्भावना, नेकपा माले व संयुक्त लगायत दलत दगुइ सत्ता साझेदारीया निंतिं थीथी चरणय् अनौपचारीक सहलह जूगु दु ।
अथेहे सत्ता समीकरण राजनीतिइ निर्णायक मधेशी जनअसधिकार फोरमं माओवादी, एमाले व कांग्रेस नाप न्हूगु सरकारया नेतृत्व थःपिंसं यायेदेये माःगु माग याःगु दु । फोरमं माओवादी नाप हाकनं गठबन्धन यायेफइगु व चीचीधंगु दलत दुथ्याकाः सत्ता चलेयायेफइगु जुगुलिं थःगु नेतृत्वयात स्वीकार यायेत प्रस्ताव तःगु दु ।
संविधान सभाय माओवादी व फोरमया याना निसः व गुइनिम्ह सभासदत दुसाः छुं चीचीधंगू दलतय् समर्थन दुसाः स्वसः व छगू सित थ्यंकाः बहुमत दयेकेत थाकूइ मखु । आः सरकार देयेकेत फोरम व चीचीधंगु दलया निर्णय भूमिका जुइगु खनेदु ।
