भारतलिसे न्हूगु स्वापू विकसित : डा. भट्टराई
एकीकृत नेकपा माओवादीया न्वकु डा. बाबुराम भट्टराईं थःगु न्हू दिल्ली भ्रमणं भारतलिसे न्हूगु स्वापू बिकसित जूगु धयादीगु दु । आः नेपाःया आन्तरिक मामिलाय् भारतं हस्तक्षेप मयाइगु वय्कलं विश्वास प्वंकादीगु खः । विवेकानन्द फाउन्डेशनं न्हू दिल्लीइ ग्वसाः ग्वःगु छगू गोष्ठीइ ब्वति कयाः थौं सनिलय् थःगु देय् लिहाँ लिहाँ झायादीम्ह डा. भट्टराईं अन्तर्राष्ट्रिय विमानस्थलय् पत्रकारतलिसे खँल्हानादिसें भारतं नेपाली राजनीतिइ हस्तक्षेप यायेमज्यूगु महशुस याःगु न्ह्यथनादीगु दु । दिल्ली भ्रमणया झ्वलय् उच्च नेतृत्वलिसे प्रत्यक्ष सहलह जूगुलिं आः भारतलिसेया स्वापू न्हूगु ढङ्गं न्ह्यःने न्ह्याइगु डा. भट्टराईया धापू खः ।
नेपाःया राजनीतिक दलतदथुइ सहमति जूसा माओवादी नेतृत्वया सरकार नं स्वीकार्य जुइगु भारतीय उच्च नेतातय्सं धयादीगु डा. भट्टराईं पत्रकारपिंत जानकारी बियादिल । भारतीय नेतातलिसेया नापलाये ज्याय् छम्ह मनुखं मेम्हसिया बिचाः थुइकेगु महत्वपूर्ण ह्वःता चूलाःगु धयादिसें वय्कलं माओवादीयात ब्यागलं तयेगु नीति मदुगु उमिसं धयादीगु नापं जानकारी बियादिल । छगू ब्यागलं प्रसङ्गय् वय्कलं नेपाःया शान्ति प्रक्रिया उत्कर्षय् थ्यंगुलिं अनमिन नेपाःपाखें लिहाँ वनेमज्यूगु धयादीगु दु । पत्रकार नापलाये ज्याय् माओवादी स्थायी समिति दुजः वर्षमान पुन 'अनन्तं' गोष्ठीइ भारतं सुरक्षा सम्बन्धी च्यूताः तःगु नं जानकारी बियादीगु दु ।
