राष्ट्रपतिया निर्देशन विरुद्ध सर्वोच्चय् रिट
सरकारं कारवाही याम्ह प्रधानसेनापतियात पदय् बहाल जुयाच्वनेत राष्ट्रपति डा. रामवरण यादवं ब्यूगु निर्देशन खारेजीया माग यासें सर्वोच्चय् सोमवाः रिट दायर जूगु दु ।
'इन्टरपियड इन्टरनेशनल'या पाखॆं श्रीकृष्ण सुवेदी लगायतं मन्त्रिपरिषदया निर्णय विपरीत राष्ट्रपितं ब्यूगु निर्दॆशन असंवैधिनिक जूगु दाबी सहित रिट दायर याःगु ख: । रिटय् राष्ट्रपति, मन्त्रिपरिषदया ज्याकू, सैनिक मुख्यालय व प्रधानसेनापति रुक्मांग कटवालयात विपक्षी देयेकातःगु दु ।
थ्वया दथुइ कानुन विदतय्सं संवैधानिक दायरा पिनेवनाः निर्णय मयायेत राष्ट्रपतियात सुझाव ब्यूगु दु । सरकारं कारवाही याम्ह सेनापतिया खँयात कयाः राष्ट्रपतिं ल्ह्वंगु पलाखं उत्पन्न लिपांगु परिस्थितिया बारे परामर्श यायेत सःतुवलय् कानुन विदतय्सं राष्ट्रपतियात थंज्याःगु सुझाव ब्यूगु ख: । वयकिपंसं संविधानया रक्षा यायेगु राष्ट्रपतिया कर्तव्य जुसां नं सेनापतिया खँय् अत्याधिक शक्ति छ्यःगु प्रति राष्ट्रपतिया ध्यानाकर्षण याःगु दु ।
राष्ट्रपति यादवं धासाः संविधानया रक्षक जूगु नातां सम्भावित क्षतियात नियन्त्रण यायेत उगु पलाः ल्ह्वानाःगु धयादिल ।
परामर्शया निंतिं कानुनविद टीकाराम भट्टराई, भिमार्जुन आचार्य व चन्द्रकान्त ज्ञवाली लगायत पुचः सनिलय् शितल निवास थ्यंकूगु खः ।
