थनिंनिसें एमाले येँ जिल्लाया एकता अधिवेशन

थौं राजधानीइ एमालेया शक्ति प्रदर्शन

येँ (सन्ध्या टाइम्स)/संविधानसभाया चुनावय् झिगू मध्ये छगू हे क्षेत्रय् मत्याःगु येँ जिल्लाय् थनिंनिसें एमालेया जिल्ला अधिवेशन शुरु जूगु दु। थ्व झ्वलय् एमालें थौं येँया थीथी थासं जुलुस पिकयाः थःपिनि शक्ति प्रदर्शन नं यात ।

स्वनिगःनापं स्वनिगःया जःखः च्वंपिं एमाले कार्यकर्तात तकं सतकय् क्वकायाः याःगु उगु शक्ति प्रदर्शन लिपा खुल्ला मञ्चय् न्याक्वःगु जिल्ला अधिवेशनया उलेज्या याइगु ज्याझ्वः दु। उलेज्या न्ह्यः येँया थीथी गुंगू थासं १२ बजे सांस्कृतिक बाजं व झाँकी जुलस पिकाःगु खः ।

पार्टी अध्यक्ष झलनाथ खनालं उलेज्या यानादीगु उलेज्या समारोहय् एमालेया वरिष्ठ नेता नापं प्रधानमन्त्री माधव कुमार नेपाल, स्थायी समितिया दुजः केपी शर्मा ओली, स्वनिगःया इञ्चार्ज राजेन्द्र श्रेष्ठ, ल्याय्म्ह नेतात योगेश भट्टराई, रामेश्वर फुँयालपिंसं न्ववानादीगु ज्याझ्वः दु ।

न्ह्याबलें थवंथवय् विरोधाषपूर्ण अभिव्यक्ति बीगु याना वयाच्वंपिं पार्टीया स्वम्हं वरिष्ठ नेतात थौं छगू हे दबुली दनेत्यंगु जूगुलिं थौं वय्कःपिंसं गज्याःगु अभिव्यक्ति प्वंकी धकाः कार्यकर्तात उत्सुक जुयाच्वंगु दु ।

एमालेया यल व ख्वप जिल्लाया अधिवेशन क्वचाःगु दछि लिपा वयाः तिनि थौं येँ जिल्लाया अधिवेशन जुयाच्वंगु दु। येँ जिल्लाय् ताः ई न्ह्यवंनिसें हे संस्थापन पक्ष व ओली पक्ष दथुइ विवाद जुयाच्वंगु जक मखु छगू इलय् समानान्तर जिल्ला कमिटी समेत दयेकाः ज्या याःगु जुयाः थुगु जिल्लाया सम्मेलनयात पार्टीं एकताया अधिवेशन धकाः नां बिउगु दु। उकिं जिल्लाया नेतृत्वय् नं फयांफछि निगुलिं खेमाया मनूत दुथ्याकेगु कुतः जुयाच्वंगु दु ।

थौं गनं गनं एमालेया जुलुस वइ?
क्षेत्र नं. १: पद्मोदय मोड
क्षैत्र नं. २ भद्रकाली
क्षेत्र नं. ३: बागबजाः
क्षेत्र नं. ४: कमलपोखरी
क्षेत्र नं. ५: लैनचौर
क्षेत्र नं. ६: सोह्रखुट्टेपाटी
क्षेत्र नं. ७: क्षेत्रपाटी
क्षेत्र नं. ८: बसन्तपुर
क्षेत्र नं. ९ व १०: टेकू

बन्द सत्र शनिवाः राष्ट्रिय सभागृह