प्रधानमन्त्री पाखें राजीनामा
प्रधानमन्त्री पुष्पकमल दाहाल प्रचण्डं प्रधानमन्त्रीया पदं राजीनामा बियादीगु दु ।
प्रधानसेनापति रुक्मांग कटवालयात सरकारं पद मुक्त याःगु तर राष्ट्रपितं स्विकृत मयाःगु व सत्ता सझेदार लगायतया दलतय्सं विरोध या:गु कारणं सोमवाः देशवासीया नांमय् संवोधन यासें प्रधानमन्त्री प्रचण्डं राजीनामाया घोषणा यानादीगु खः ।
वयेकलं द्वैध सत्ता न्ह्यागु नं हालतं अन्त्य जुइमाःगु धासें राजीनामाया घोषणा यानादीगु खः । संबोधनय् वयेकलं आन्तरिक मामिलाय् विदेशी हस्तक्षेप प्रति आपत्ति प्वंकूसें विदेशी प्रभुसमक्ष कदापि क्वमछुइगु धयादिल । वयेकलं कुर्सीया निंतिं विदेशीया ख्वाः स्वयेमाःगु स्थिति अन्त्य जइधुंकूगु दु धयादिल ।
राष्ट्रपतियात समानान्तर शक्ति केन्द्र देयेकेत स्वःगु व सेनाय् नागरिक सर्वोच्चतायात कायम जुइमबीगु षडयन्त्र जूगु द्वपं प्रधानमन्त्री दाहालं बियादिल । वयेकलं राष्ट्रपतियात सरकारं याःगु निर्णय पनेगु छुं अधिकार मदुगु धयादिल । राष्ट्रपतिया असंवैधानिक कदम भिंकेमाःगु दक्वसिया दायित्व जूगु वयेकलं संबोधनय् धयादिल ।
राष्ट्रपति डा. रामवरण यादवं थौं हे प्रधानमन्त्री पुष्पकमल दाहाल प्रचण्डं बियादीगु राजीनामा स्वीकृत यानादीगु दु ।
