बाबुरामं विदेशमन्त्रीयात व सुजातां भाजपा नेतालिसे नापलात
उपप्रधानमन्त्री सुजाता कोइराला व एकीकृत नेकपा (माओवादी)या न्वकु डा.बाबुराम भट्टराईं राजनीतिक नापलाये ज्यायात गति ब्यूगु दु ।
निम्हसिनं थौं भारतीय प्रभावशाली नेतातलिसे नापलाये ज्यायात न्ह्यःने न्ह्याकूगु खः । भट्टराईं भारतीय विदेशमन्त्री एस.एम कृष्णालिसे नापलानादीगु खः । नापलाये ज्याय् कृष्णां नेपालय् न्ह्यानाच्वंगु राजनीतिक पंगः व सरकार दयेके मफूगुया अवस्थाबारे नुगः खँ तयादीगु खः । वय्कलं माओवादीया भारतप्रतिया दृष्टिकोणया विषयसं नं च्यूताः प्वंकूगु खःसा नापलाये ज्याय् भट्टराईं नेपाःया शान्ति व संविधान निर्माण ज्यायात लिच्वलय् थ्यंकेत राष्ट्रिय सहमतिया आवश्यकता न्ह्यथनादिसें सहमतिं हे सरकार निर्माण याःसा शान्ति व संविधानया भावी लँपु सहज जुइगु धयादीगु खः ।
माओवादी भारतलिसेया स्वापू भिंकेगु व नेपाःया विकासय् भारतया भूमिका विषयसं सकारात्मक दुसां नं भारतीय दवाब जुइमज्यूगु धयादीगु खः । अथेहे भारत भ्रमणय् हे दीम्ह उपप्रधानमन्त्री सुजाता कोइरालां नं राजनीतिक नापलाये ज्यायात निरन्तरता ब्यूगु दु । वय्कलं थौं भाजपाया बरिष्ठ नेता लालकृष्ण आडवाणी, पुलांम्ह नायः राजनाथ सिंह व नायः नितिन गडगडिलिसे नापलानाः दीगु खः । उगु हे झ्वलय् नेपाःया लिपांगु राजनीतिक अवस्थालिसे भारतीय जनता पार्टीं नेपाःयात हाकनं हिन्दु अधिराज्य दयेकेमाःगु धकाः धयादीगु सन्दर्भय् उपप्रधानमन्त्री कोइरालां नुगः खँ तयादीगु खः ।
लिसलय् आडवाणी, सिंह व गडगडिं नेपाःमि जनतां याइगु निर्णय थःपिंत स्वीकार्य जूगु धयादिसें उकिइ थःपिनिगु छु नं स्वार्थ मदुगु स्पष्ट यानादीगु खः । वय्कलं थौं हे गृहमन्त्री पी चिताम्बरमलिसे नापलायेगु ज्याझ्वः नं क्वःछीनातःगु दु । कोइरालां विदेशमन्त्री एस.एम कृष्णालिसे लञ्च टक यायेगु क्वःछ्यूगु खः ।
कोइरालां म्हिगः कांग्रेस आईया सहमहामन्त्री यज्ञश मल्लिक व भारतीय जनता पार्टीया विदेश विभाग प्रमुख विजय जोलीलिसे नापलानाः दीगु खः । वय्कलं भारतीय समाजवादी नेता सुरेन्द्र भदौरिया व राष्ट्रवादी कांग्रेसया महामन्त्री डीपी त्रिपाठीलिसे नापलानाः दीगु खः ।
अथेहे थौं सुथंनिसें विवेकानन्द फाउण्डेशनपाखें ग्वसाः ग्वःगु गोष्ठी न्ह्याःगु दु । थौंया गोष्ठीइ तराईया सन्दर्भपाखें विशेष सहलह जुइगु ज्याझ्वः दु ।
