'माओवादीयात संसदवादी दलतय्सं स्वीकार मयागुलिं शान्ति प्रक्रिया धरापय्'
एकीकृत नेकपा (माओवादी)या न्वकु डा. बाबुराम भट्टराईं संविधानसभाया दकले तःधंगु दल माओवादीयात संसदवादी दलतय्सं स्वीकार यायेमफूगुलिं नेपाःया शान्ति प्रक्रिया धरापय् लाःगु खँ धयादीगु दु ।
वय्कलं माओवादीयात याकः यायेगु कुतः जुयाच्वंगुलिं भारतया न्हू दिल्लीइ तत्कालिन न्ह्यगू दल व माओवादी दथुइ जूगु झिंनिगू बुँदे समझदारी लगभग भंग जुइगु अवस्थाय् थ्यंगु धयादिल । विवेकानन्द फाउण्डेशनं न्हू दिल्लीइ ग्वसाः ग्वःगु सेमिनारय् ब्वति कायेत भारतय् दीम्ह डा. भट्टराईं सरकार समर्थित पत्रिका 'दी हिन्दू'यात अन्तवार्ता बियादिसें थथे धयादीगु खः ।
नेपाःया जनता व राजनीतिक दलत भारतया हित स्वये चाहे जूगु न्ह्यःथनादिसें भट्टराईं नीछगूगु शताब्दीइ पुलांगु सन्धित पुनरावलोकन यायेमाःगु धयादिल । सन्धित पुनरावलोकन जूसा निगुलिं देय्या शान्ति, स्थायीत्व, विकास व प्रजातन्त्रया नितिं फाइदा जुइगु वय्कःया निष्कर्ष दु ।
माओवादीयात सत्ताय् मछ्वयेगु भारतं भूमिका म्हितूगु द्वपंयात वय्कलं 'सामान्य धारणा' धकाः बिचाः तयादिल । भारतलिसे माओवादीया स्वापू भिंकेगु निंतिं थःगु भ्रमण फलदायी जुइगु विश्वास डा. भट्टराईं प्वंकादिल ।
थ्वहे दथुइ न्वकु डा. भट्टराई व भारतीय जनता पार्टीया नेतृ सुष्मा स्वराज दथुइ थौं हे खँल्हाबंला जूगु दु । वय्कलं विदेशमन्त्री एस.एम. कृष्णा व गृहमन्त्री पी चिताम्बरलिसे नं नापलायेगु ज्याझ्वः दु । डा. भट्टराईं म्हिगः प्रणव मुखर्जी, शिबशंकर मेनन व विदेश छ्याञ्जे
निरुपमा रावलिसे नापलानादीगु खः ।
