स्वंगू दलया मुँज्या क्वचाल, दलतय्सं आन्तरीक सहलह याइगु
अनमिनया बहिर्गमनलिपा माओवादी जनसेनाया समायोजन, व्यवस्थापन व रेखदेखलिसे अनुगमन यायेगु जिम्मेवारीया विषयस थौं मू स्वंगू दलत दथुइ सहलह जूगु दु । लडाकुया जिम्मेवारी सेना समायोजन विषेश समितियात बीगु वा वैकल्पिक संयन्त्र नीस्वनेगु धइगु विषयलय् सहलह जूगु खः ।
सिंहदरवारस्थित शान्ति मन्त्रालयलय् थौं च्वंगु मुँज्याय् माओवादीं अनमिनलिपा मेगू समिति दयेकाः अनुगमनया भाला बीमाःगु प्रस्ताव याःगु खःसा उगु विषयलय् दलत दथुइ सकारात्मक सहलह जूगु खँ माओवादी न्वकु नारायणकाजी श्रेष्ठ 'प्रकाशं' जानकारी बियादिल ।
न्वकू श्रेष्ठं सेना समायोजनबारे दयेकीगु बैकल्पिक संयन्त्रं नेपाली सेनाया नं अनुगमन यायेमाःगु धासें अथे मयाःसा शान्ति सम्झौता भंग जुइगु ख्याच्वः बियादिल ।
मुँज्या लिपा कांग्रेस संसदीय दलया नेता रामचन्द्र पौडेलं अनमिन बहिर्गमनया प्रकृया निश्चित जुइधुंकाः सेना समायोजन विशेष समितियात हे अधिकार सम्पन्न यायेगुया विकल्प मदुगु धासें विशेष समितियात हे सक्रिय यायेगु बारे सहलह जूगु जानकारी बियादिल ।
अथेहे गृहमन्त्री भीम रावलं दलतदथुइ जूगु थौंया सहलहस विशेष समितिं हे ज्या यायेगु वा थ्व स्वयाः न्ह्यःया सम्झौतायात बिचाः यानाः मेगु संयन्त्र नीस्वनेगु धइगु विषयसं सहलह जूगु धयादिल ।
मेगु संयन्त्र नीस्वनेगु विषयस दलतय्सं थःथःगु पार्टी दुने गृहकार्य यानाः समितिइ च्वनीपिनिगु नां क्वःछीत मेगु मुँज्या च्वनेगु सहमतिलिसे थौंया बैठक क्वचाःगु दु । अनमिन नेपाःपाखें बिदा जुइत छवाः जक ल्यं दनीगु इलय् नं ई तनेगु वा मतनेगु धइगु विषयस दलत दथुइ कचवं कायम जूसां नं अनमिनया बिदाया नितिं धाःसा फुक्क दलतय्सं मानसिकता दयेकेधुंकूगु दु ।
