शान्ति प्रक्रिया असफल जुइगु संभावना
येँ (सन्ध्या टाइम्स)/ राष्ट्र संघीय नियोग अनमिनं राजनीतिक दलतय् निजी स्वार्थया कारणं नेपालय् शान्ति प्रक्रिया असफल जुइगु सम्भावना अप्वयावःगु ख्याच्वः बिउगु दु। नेपालय् आः 'नाटकीय' राजनीतिक अवस्था जुयाच्वंगु नापं उकियात उल्टेयाये मफुतले हे खतरा अप्वयाच्वनी नं अनमिनं ख्याच्वः बिउगु दु। न्युयोर्कय् राष्ट्र संघीय सुरक्षा परिषदय् वंगु चान्हय् नेपाःया शान्ति प्रक्रिया सम्वन्धि अन्तिम प्रतिवेदन पेश यासें अनमिनया प्रमुख करिन लेनग्रेनं शान्ति प्रक्रियाय् ग्यानापुगु गतिरोध ब्वलंगुलिं शान्ति प्रक्रिया निष्कर्षय् थ्यनीगु खँय् संका नं यानादिल। एकीकृत माओवादीं धयाच्वंगु जनविद्रोह व सम्भावित राष्ट्रपति शासनं जनताय् त्रास ब्वलंगुलिं अज्वःगु गतिविधिं शान्ति प्रक्रियाय व लोकतन्त्र खतराय् लाइ धकाः लेनग्रेनं धयादिल। ल्वाभः व लडाकु अनुगमनयात निरन्तरता बीगु निकाय गठन जुइ मफुनिगुलिं अनमिन लिहां वने धुंकाः छु जुइगु खः धइगु खँय् नं अन्यौल ल्यना हे च्वंगु दु धकाः नं धयादिल ।
