देय्या कार्यकारी प्रमुख प्रत्यक्ष निर्वाचन पाखें : चिंचीधंगु दल
संविधानसभाय् प्रतिनिधित्व याइगु चिचीधंगु दलतय्सं न्हूगु संविधानय् देय्या कार्यकारी प्रमुख प्रत्यक्ष निर्वाचित जुइमाःगु खँय् बः ब्यूगु दु ।
सिंहदरबारय् थौं च्वंगु नीच्यागू दलया मुँज्याय् शासन प्रणालीबारे बिचाः तसें चिचीधंगु दलया नेतातय्सं उगु खँ न्ह्यथंगु खः । मुँज्या लिपा नेकपा (एमाले)या नायः झलनाथ खनालं आपालं चिचीधंगु दलतय्सं कार्यकारी प्रमुख प्रत्यक्ष निर्वाचित जुइमाःगु जानकारी बियादीगु खः । अथेहे एकीकृत नेकपा (माओवादी)या न्वकु नारायणकाजी श्रेष्ठ 'प्रकाशं' आःया शासन व्यवस्था स्वयाः ब्यागलं जुइमाःगु धयादीगु दु ।
समाजवादी प्रजातान्त्रिक जनता पार्टीया नायः लिसें कानूनमन्त्री प्रेमबहादुर सिंहं चिचीधंगु दलत न्हूगु संविधानय् मिश्रति निर्वाचन प्रणालीया व्यवस्था जुइमाःगु पक्षय् दुगु जानकारी बियादिल । मुँज्याय् स्वंगू प्रतिशत मत हइगु पार्टी राष्ट्रिय पार्टी जुइ दइ वा मदइ धइगु विषयसं नं सहलह जूगु खः ।
उच्चस्तरीय राजनीतिक कार्यदलं क्वःछीमफूगु च्यय्स्वंगू बुँदात मध्ये थनिंनिसें राज्यया शासकीय स्वरुप निर्धारण समितिया प्रतिवेदन अन्तर्गतया निर्वाचन प्रणाली व शासकीय स्वरुपया विषयसं नीच्यागू दलं सहलह न्ह्याकूगु खः ।
चिचीधंगु दलतय्सं बिचाः तयेधुंकाः कन्हय् निसें तःधंगु दलतय्सं थःगु बिचाः तयेगु ज्या न्ह्याइ । नीच्यागू दलया मुँज्या कन्हय् सुथय् च्याताः इलय् हाकनं च्वनी ।
