भारतं नेपाः सम्बन्धी न्हूगु नीति दयेकीगु
नेपाली पक्षया बिचाः थुइकाः भारतं नेपाः सम्बन्धी न्हूगु नीति दयेकीगु जूगु दु ।
नेपाःया राजनीतिक दल, संविधानया ज्ञाता लिसे सुरक्षा विज्ञतलिसे सहलह यानाः भारतं नेपाः सम्बन्धी न्हूगु नीति दयेकेत्यंगु खः । नेपाः सम्बन्धी नीति दयेकेत भारतं 'नेपाःया विकास क्रम लिसे अग्रगमन' विषयक निन्हुया गोष्ठी ग्वसाः ग्वःगु दु ।
विवेकानन्द फाउन्डेशनपाखें न्हू दिल्लीइ ग्वसाः ग्वःगु गोष्ठी थनिंनिसें न्ह्याःगु दु । नेपाःया शान्ति प्रक्रियाय् थःगु भूमिका अप्वयेकेत भारतं न्हूगु नीति दयेकेत गोष्ठी ग्वसाः ग्वःगु भारतीय सञ्चार माध्यमतय्सं जानकारी ब्यूगु दु ।
नेपाःया आन्तरिक मामिलाय् प्रत्यक्ष हस्तक्षेप यानाः वःगु भारतं क्वःछीगु न्हूगु नीतियात राजनीतिक ख्यलय् विशेषा रूची पूर्वक स्वःयाच्वंगु दु । भारतया विदेशमन्त्री एस.एम. कृष्णां नं ब्वति काइगु गोष्ठीइ राजनीतिक समझदारीया नीति, संविधान च्वयेगु, शान्ति प्रक्रिया, तराईया समस्या व नेपाःया अर्थतन्त्र लगायत विषयसं ब्यागल ब्यागलं सत्रय् सहलह जुइ ।
गोष्ठीइ ब्वति कायेत एकीकृत नेकपा (माओवादी)या न्वकू डा. बाबुराम भट्टराई व नेता वर्षमान पुन 'अनन्त', उपप्रधानमन्त्री लिसे कांग्रेस नेतृ सुजाता कोइराला, नेपाली कांग्रेसया नेतात प्रकाशमान सिंह व प्रदीप गिरी, नेकपा (एमाले)या प्रदीप ज्ञवाली व अग्नी खरेल नापं फोरम लोकतान्त्रिकया जितेन्द्र देव म्हिग न्हू दिल्ली वंगु खः ।
अथेहे पूर्वसभामुख दमननाथ ढुङ्गाना, संविधानविद् डा. भीमार्जुन आचार्य, पूर्वप्रधानसेनापति रुक्माङ्गत कटवाल, अर्थविद् विश्वम्भर प्याकुरेल नं सम्मेलनय् ब्वति कायेत न्हू दिल्लीइ झायाच्वनादीगु खः ।
