२८ दलपाखें १ सय २७ बुँदा अनुमोदन

येँ (झीगु स्वनिगः)

न्हूगु संविधान निर्माणया नितिं एकीकृत नेकपा (माओवादी) या नायः पुष्पकमल दाहाल प्रचण्डया नेतृत्वय् न्हय्गू दलया उच्च स्रतरीया राजनीतिक कार्यदलय् सहमति जूगु १ सय २७ बुँदायात हे संविधानसभाय् दुथ्याःगु २८ दलया मुँज्यां अनुमोदन याःगु दु । म्हिगः बुधवाः सिंहदरवारय् च्वंगु २८ दलया मंकाः मुँज्यां अथे १ सय २७ बुँदायात हे अनुमोदन याःगु खः धकाः छम्ह नेतां जानकारी बियादीगु दु ।
आः संविधान निर्माणया सवालय् ल्यंदनिगु विवादित ८३ बुँदायात नं २८ दलया मुँज्याय् सहलह ब्याकीगु जूगु दु । म्हिगःया मुँज्याय् न्हूगु संविधानया नां व प्रस्तावनाया बारे नं सहलह जूगु तर उगु खँय् धाःसा विवाद जूगुलिं हाकनं थौं विहिवाः २८ दलया हे मुँज्या च्वनाः उगु बुँदाय् नं सहमति ब्वलंकेगु कुतः जुइ धकाः धयादीगु दु ।

थ्व हे दथुइ न्हूगु संविधान च्वयेगु नितिं मू मू विवाद जुयाच्वंगु विषययात संविधानसभां हे क्वःछिइगु जूगु दु । संविधानसभाय् प्रतिनिधित्व यानाच्वंगु २८ दलं विवादित फुक्क बुँदायात सहमतिया कुतः यानाः म्हो म्हो यानाः यंकेगु अले ल्यंदुगुयात संविधानसभाय् मतदान यानाःसां क्वःछिइगु धकाः नं धाःगु दु । विवाद जुयाच्वंगु बिषययात २५/३० य् सिमित यायेगु अले संविधानसभाय् चुनाव यानाः जूसां फुक्क विवाद ज्यंकेगु धकाः २८ दलया हे नेतात सहमति जूगु दु । दलतय्गु दथुइ न्हूगु संविधानया नितिं १ सय २७ गू बुँदाय् सहमति जूसां नं शासकीय स्वरुप, राज्य पुनःसंस्रचना, भुमिसुधार, न्यायपालिका नापं छुं छुं महत्वपूर्णगु बुँदाय् धाःसा सहमति जुइ फयाच्वंगु मदु ।