माओवादीपाखें जनविद्रोहया कार्यदिशा क्वःछित, माघ ३ गतेनिसें देय्व्यापी प्रशिक्षण
जनविद्रोहया कार्यदिशा क्वःछीना एकीकृत नेकपा (माओवादी)या केन्द्रीय समिति मुँज्या थौं क्वचाःगु दु ।
पार्टी मू ज्याकुथी निन्हु तक न्ह्याःगु केन्द्रीय समिति मुँज्यां नायः पुष्पकमल दाहाल 'प्रचण्डं' वरिष्ठ न्वकु मोहन वैद्य 'किरण'या प्रतिवेदनयात कःघानाः न्ह्यब्वःगु प्रतिवेदन पारित याःगु खः । शान्ति व संविधानया निंतिं आपालं कुतः यायेगु व पंगः जूसा जनविद्रोहलय् वनेगु माओवादीं जानकारी ब्यूगु दु ।
थ्व स्वयाः न्ह्यः स्थगित प्रशिक्षण वइगु माघ ३ गतेनिसें न्ह्याकाः १७ गते तकया दुने क्वचायेकेगु निर्णय जूगु दु । प्रवक्ता दीनानाथ शर्माया कथं माघ ३ गते नेवाः व ताम्सालिङ राज्य समितिया कार्यकर्तापिनिगु मंकाः प्रशिक्षण येँय् न्ह्याइ । अथेहे ५ गते तमुवान राज्य समितिया पोखराय्, ७ गते मगरातया दाङय् व ९ गते भेरी व कर्णालीया सुर्खेतय् प्रशिक्षण जुइ । अथेहे ११ गते सेती-महाकाली व थारुवानया कैलालीइ, १३ गते अवधया बुटवलय्, १५ गते मिथिला व भोजपुराया जनकपुरय् व १७ गते कोचिला व लिम्बुवानया झापाया दमकय् प्रशिक्षण जुइगु माओवादीं जानकारी ब्यूगु दु ।
किराँत लिसे प्रवास राज्य समिति जिल्लाया प्रशिक्षण धइगु सम्बन्धित राज्य समितिं व्यवस्थापन यायेगुकथं क्वःछ्यूगु दु । प्रशिक्षणया झ्वलय् न्वकु डा. बाबुराम भट्टराईया ब्यागलं प्रतिवेदनय् नं सहलह न्ह्याकेगु बैठकं निर्णय याःगु दु । तत्कालिन कार्यनीतिलिसे सम्बन्धित मतभेदयात आन्तरिक प्रकाशन 'विचारधारा' नांया बैचार प्रधान पत्रिकापाखें पार्टी पङ्क्तीइ प्रवाहित यायेगु बैठकं निर्णय याःगु दु । माओवादीं प्रशिक्षणयात संघर्षया पूर्व तयारी धकाः न्ह्यःथंगु दु ।
थुकिया नितिं बरिष्ठ न्वकु मोहन वैद्य 'किरण'यात सङ्गठनया इन्चार्ज व नेत्रविक्रम चन्द 'विप्लव'यात युवापिनिगु नेतृत्वया भाला ब्यूगु दु । मेमेपिं नेतापिनिगु भाला धाःसा यथावत तःगु दु । कार्यविभाजनया लिपांगु भाःला क्वःछीगु अधिकार धाःसा स्थायी समितियात ब्यूगु दु ।
