माओवादी न्हूगु प्रक्रियाय् वयेत बाध्य : पोख्रेल

सूचना लिसे सञ्चारमन्त्री शङ्कर पोख्रेलं अनमिनया बिदालिपा एकीकृत नेकपा माओवादी न्हूगु प्रक्रियाय् वयेत बाध्य जुइगु धयादीगु दु । प्रेस चौतारी मकवानपुरपाखें थौं हेटौडाय् ग्वसाः ग्वःगु पत्रकार नापलाये ज्याय् मन्त्री पोख्रेलं शान्ति प्रक्रियायात न्हूगु प्रक्रियापाखें क्वःछीत सरकार न्ह्यःज्यानाच्वंगु जानकारी बियादीगु खः ।

संविधानसभाय् दकले तःधंगु शक्तियारुपं दुगु एकीकृत नेकपा माओवादी संविधानप्रति आस्थावान् मजूगु हुनिं वर्तमान संकट अप्वःगु वय्कःया धापू खः । माओवादीइ अझ नं विद्रोहया मानसिकता दुगु मन्त्री पोख्रेलया धापू खः ।