थौं नं थाय्थासय् प्रदर्शन शुरु
प्रधान सेनापति रुक्मांगद कटवालयात चीकेगु सरकारी निर्णययात बदर याःगु कारणं आः माओवादीं डा. रामवरण यादव विरुद्ध नं थःपिनि आन्दोलन न्ह्याकीगु जूगु दु । थ्व झ्वलय् थौं माओवादीं येँय् प्रदर्शन शुरु नं यायेधुंकूगु दु । थौं सुथय् १० बजे कालिमाटी, ग्वंगःबु, चाबही, कोटेश्वर, सोर्हखुट्टे व यलया लगंख्यलं जुलुस पिकाःगु दु ।
उखे कांग्रेस समर्थित नेविसंघं थौं सुथय् प्रधानसेनापतियात कारवाही याःगु विरुद्ध थीथी क्याम्पस न्ह्यःने प्रदर्शन याःगु दु । नेविसंघया विद्यार्थीतय्सं टायर च्याकाः थ्व प्रदर्शन याःगु खः । थुकिं यानाः थौं त्रिचन्द्र क्याम्पस न्ह्यःनें सवारी साधन वयेवने बन्द याना बिउगु दु । नेवि संघं म्हिगः नं कटवालयात याःगु कारवाहीया विरुद्ध प्रदर्शन याःगु खःसा सतकय् वःपिं नेवि संघया कार्यकर्तातय्त लिपा वाईसीएल कार्यकर्तातय्सं लिना छ्वःगु खः ।
थौं सनिलय्पाखे स्थिति तनावपूर्ण जुइफु धकाः स्वनिगःया स्कूलय् बिदा बियाहःगु दु । सर्वसाधारणं धाःसा आः येँय् कफर्यु तइगु शंका नं याना हःगु दु ।
