विवेक शाहया सफुलिं पत्रकारत तम्वल
येँ (सन्ध्या टाइम्स)/नारायणहिति राजदरवारया पुलांम्ह सैनिक सचिव विवेक शाहया सफू 'मैले देखेको दरवार' बजारय् तसकं बय्बय् जुयाच्वंसां राजधानीया छुं पत्रकारतय्त धाःसा थुकिं तम्वयेका नं बिउगु दु ।
सफुली दरवारया समाचार च्वइपिं पत्रिका व छुं पत्रकारतय् नां नं उल्लेख दु। उकी खास यानाः सहयोगी वाःपौ 'जनआस्था'या नां न्ह्यथँसें उगु वाःपौयात दरवारया समाचार बीपिं धकाः छुं मनूतय् नां नं किटान यानातःगु दु। तर 'जनआस्थां' धाःसा उकी उल्लेखित मनूत थःपिनि समाचार स्त मखु धासें पुलांम्ह सैनिक सचिव शाहं खिउँथाय् गोलीं कयेकूगु टिप्पणी याःगु दु। थज्याःगु फय्गं सूचना मुंका जुइपिं मनूतय्त थःपिनि एडीसी दयेकातःगु कारणं हे दरवारं जनताया सही सूचना काये मखनाच्वंगु टिप्पणी समेत 'जनआस्थां' याःगु दु
।
उखे मेम्ह पत्रकार टिकाराम राईं नं थःगु बारे सफुली उल्लेखित खँयात कयाः स्पष्टीकरण बीधुंकूगु दु। राईयात दरवारया मनूतय्सं हे प्रेस न्याना बिउगु खँ सफुली च्वयातःगु खः ।
थ्वहे झ्वलय् सफूया च्वमि विवेक शाहं कन्हय् बुधवाः येँया अन्नपूर्ण होटलय् थःगु सफूयात कयाः छगू अन्तर्क्रिया ज्याझ्वः यायेत्यंगु दु। उगु ज्याझ्वलय् सफूया बारे टिप्पणी यायेत पुलांम्ह जनरल सदिपबहादुर शाहयात नं सःतातःगु दु। तर सफुली धाःसा स्वय्म भाजु शाहयात हे 'जनआस्था'यात सुराकी धकाः च्वयातःगु दु। शाहं कन्हय्या ज्याझ्वलय् उकियात कयाः नं विरोध याइगु खँ सीदुगु दु ।
