जंगी अड्डा वनेत खड्कायात उजं
प्रधानमन्त्रीं छम्हेसित व राष्ट्रपितं छम्हेसित नियुक्त यानातःगु कारणं आः देशय् निम्ह प्रधानसेनापति वःगु दु । तर थुकी मध्यय् पुलांम्ह सेनापति रुक्मांगद कटवाल जक जंगी अड्डाय् वनाः ज्या यानाच्वंगु दुसा कामु प्रधान सेनापति कुलबहादुर खड्का धाःसा थौं सुथय् तक छेँय् हे दनि ।
सूत्रतय्सं बिउगु जानकारी कथं राष्ट्रपितं म्हिगः कटवालयात च्वया छ्वःगु पौया कारणं वय्कः अन्यौलय् लानाच्वंगु दु । अथे खःसां थौं सुथय् वय्कःयात रक्षा मन्त्री रामबहादुर थापा बादलं फोन यानाः राष्ट्रपतिया पौ बारे थःपिंसं बिचाः यानाच्वनागु दु, छि चाहिं जंगी अड्डा वनाः ज्या यानादिसं धकाः निर्देशन बियादीगु खँ सीदुगु दु ।
जंगी अड्डाय् निम्ह सेनापति वःगु कारणं अनया सैनिकतय् दथुइ धाःसा आः सुयागु आदेश पालना यायेगु धकाः अन्यौल वःगु दु । म्हिगः सरकारया निर्णय वयेधुंकाः सेनां सकसितं एलर्ट याःगु दु । स्थिति बारे सहलह यायेत थौं जंगी अड्डाय् जर्नेलतय् बैठक न्ह्यानाच्वंगु दु ।
