नेवानिइ हानं अख्तियार दुहां वइगु खतरा
क्या. लिम्बुयात कार्यकारी अधिकार मबिसे ज्या
येँ (सन्ध्या टाइम्स)/नेपाल वायुसेवा निगमया महाप्रवन्धक के.बी. लिम्बुं म्हिगःनिसें निगम ज्याकुथी दुहां वनाः ज्या शुरु यानादिल। तर वय्कलं ज्या शुरु यानादीसां वय्कलं अन यानादीगु ज्याया हे कारणं निगम दुने हानं छक्वः अख्तियार दुहां वये फइगु आशंका अनया कर्मचारीतय्सं प्वंकूगु दु ।
निगमया कार्यकारी अध्यक्ष सुगतरत्न कंसाकार विरुद्ध अख्तियारं मुद्दा दायर याःगुलिं वयां क्वय्याम्ह अधिकृत जूगु ल्याखं भाजु लिम्बुं निगमया प्रमुख मनू जुयाः ज्या याये माःगु खः। तर निगमया कर्मचारीतय्सं वय्कःया हे कारणं निगमया विमान न्यायेगु खँ अख्तियारय् वंगु खः धासें वय्कःयात निगमय् दु हे मकायेगु कथं धर्ना ज्याझ्वः न्ह्याकुगु खः। तर म्हीग निगमया कर्मचारी व व्यवस्थापन दथुइ सहमति जुयाः वय्कःयात म्हिगःनिसें ज्या याके बिउगु खः ।
तर निगमय् वय्कःयात ज्या याके बिउसां निगम दुने ज्या यायेगु कार्यकारी अधिकार धाःसा आः तक वय्कःयात सुनां नं बिउगु मदुनि। अज्याःगु अधिकार बीगु निकाय निगमया सञ्चालक समिति खः। तर थौंकन्हय् सञ्चालक समिति हे निलम्बनय् लानाच्वंगु दु। निगमय् गबलें अध्यक्ष कार्यकारी जुइसा गबलें निर्देशक कार्यकारी जुइ। भाजु केबी लिम्बु महाप्रवन्धक खः। तर महाप्रबन्धक खःसां वय्कःयाके कार्यकारी अधिकार धाःसा मदु। थुकिं यानाः वय्कलं निगम दुने छुं ज्या यात धाःसा थ्व ला अधिकार हे मदुम्ह मनुखं याःगु ज्या धकाः कन्हय् उकिया विरुद्ध हानं नं अख्तियारं ज्वं वये फुगु खँ निगमया विज्ञ कर्मचारी सूत्रं धाःगु दु ।
सूत्रं यदि निगमय् आः हानं अख्तियार दुहां वयाः अनया फाइल आदि ज्वना वन धाःसा थुकिं निगमयात ध्वस्त हे याना बीगु खतरा दुगु खँ नं धाःगु दु ।
उखे कर्मचारी युनियनतय्सं भाजु लिम्बुयात न्हापा तयातःगु सर्त छुं हे न्ह्यमथँसे ज्याकुथी दुकायेगु निर्णय याःगु खँय् मेपिं कर्मचारीत रुष्ट जुयाच्वंगु खँ नं सीदुगु दु।
कर्मचारीतय्सं वय्कःयात निगमय् छुं तःधंगु निर्णय मयायेगु, आः खरिदया लागिं वनाच्वंगु जहाज बारे छुं न्वमवायेगु, कर्मचारी सरुवा बढुवा मयायेगु, सुयातं पूर्वाग्रह तयाः ज्या खँ मयायेगु धइगु सर्त तःगु खः, आः सम्झौता जूबलय् उगु सर्तयात वेवास्ता याःगु द्वपं लानाच्वंगु दु ।
