तुया किसानतय्सं राजमार्ग अवरुद्ध
सरकारं क्वःछिउगु तुया भाः मान्य मजुइगु धासें नवलपरासीया तु उत्पादक किसानतय्सं थौं नवलपरासीया बर्दघाटय् राजमार्गय् पंगः थनाः प्रदर्शन याःगु दु ।
थौं नवलपरासीइ तु उत्पादक कृषक समितिं न्यासः व न्हय्तका प्रतिक्विन्टल तुया भाः कायम जुइमाःगु माग यासें राजमार्गय् पंगः थंगु खः । राजमार्गय् पंगः जुइवं ताःहाकःगु लिसे चिहाकःगु दुरीया फुक्क सवारी साधनत ठप्प जूगु दु । तु उत्पादक कृषक समितिया छ्याञ्जे दुधनाथ गुप्तां न्यासः व न्हय्तका भाः मवत्तले आन्दोलन न्ह्याकाच्वनेगु धयादीगु दु ।
स्थानीय किसानतय्सं तुया उचित भाःया माग यासें नवलपरासीया चिनी मिलयात तु आपूर्ति बन्द यायेधुंकाः उद्योगय् चिनी उत्पादन नं ठप्प जूगु दु । थ्व स्वयाः न्ह्यः सरकारं म्हिगः प्यसः व छताका प्रतिक्विन्टल तुया भाः क्वःछीवं सर्लाहीइ आन्दोलनरत किसानतय्सं आन्दोलन लित काःगु खः ।
