प्रकाण्डया गाडी लःल्हात
एकीकृत नेकपा (माओवादी) पोलिट्व्यूरो दुजः खड्कबहादुर विश्वकर्मा 'प्रकाण्ड'या गाडी वैधानिक जूगु दावी यासें अपराध अनुसन्धान शाखा हलुमानध्वाखां थौं वय्कःयात हे लःल्हाःगु दु । वंगु पुस १५ गते खुयाःहःगु धासें महानगर परिसर प्रमुख रमेश खरेलया निर्देशनय् कब्जाय् काःगु खः ।
थःम्हं गयाःगु गाडी वैधानिक जूगु दावी प्रकाण्डं याःसां नं खरेलया निर्देशन धासें जबर्जस्ती कब्जाय् काःगु खः । शान्ति मन्त्रालयं रिफारिस याःगु पौ सार्वजनिक यायेधुंकाः नं सरकारं लित बीत तयार मजूगु खः । गाडी कायेधुंकाः छगू सञ्चार माध्यमयात प्रतिक्रिया बियादिसें प्रकाण्डं थःगु राजनीतिक लिसे चारित्रिक हत्या यायेगु उद्देश्यं अवैधानिक धकाः कब्जाय् काःगु खःसा उमिसं हे गाडी वैधानिक जूगु दावी यानाः थप पुष्टि जूगु धयादिल ।
थुगु घटनां कामचलाउ सरकार झन् नाङ्गा जूगु प्रकाण्डया धापू दु । अपराध अनुसन्धान शाखा हलुमानध्वाखां कमलपोखरीसं च्वंगु ट्राफिक ज्याकुथिइ तयातःगु प्रकाण्डया गाडी ससम्मान वय्कःयात लित बीत उजं ब्यूगु ट्राफिक ज्याकू कमलपोखरीया इन्चार्ज मिलन केसीं धयदिल । हलुमानध्वाखा परिसरं अनुसन्धान ज्वःछितक्क गाडीयात ट्राफिक ज्याकू कमलपोखरीयात भाला ब्यूगु खः ।
