माओवादी केन्द्रीय मुँज्याय् सहलह जारी
एकीकृत नेकपा (माओवादी) केन्द्रीय समितिया निन्हुया दिंया मुँज्याय् पार्टी नायः प्रचण्डपाखें न्ह्यब्वःगु परिमार्जित राजनीतिक लिसे संगठनात्मक प्रस्ताव लिसे अन्तर्संघर्ष सम्बन्धी न्यागू बुँदे प्रस्तावय् केन्द्रीय दुजःतय्सं थःगु बिचाः तःगु दु ।
थौंया मुँज्याय् पोलिटव्यूरो व केन्द्रीय समिति दुजलं थःथःगु बिचाः प्वंकूगु खः । मुँज्याय्र पार्टी न्वकु डा. बाबुराम भट्टराईं धाःसा लिखितरुपं ब्यागलं मत न्ह्यब्वःगु जानकारी प्रवक्ता दीनानाथ शर्मां बियादिल ।
भट्टराईं मू अन्तरविरोध, कार्यदिशा व लाइनय् ब्यागलं मत न्ह्यब्वःगु स्रोतं जानकारी ब्यूगु दु । पार्टी नायःपाखें न्ह्यब्वःगु कार्यविभाजनया प्रस्तावय् तप्यंक हे कार्यक्षेत्र क्वःमछ्यूसे नीतिगतरुपं कार्यविभाजन सम्वन्धी अवधारणा हःगु व उकिइ केन्द्रीय समितिपाखें सुझाव लिपा जक कार्यविभाजनया क्वःछीगु जानकारी ब्यूगु दु ।
पार्टी मू ज्याकू पेरिसडाँडाय् न्ह्यानाच्वंगु मुँज्याय् नायः प्रचण्ड व बरिष्ठ न्वकु मोहन वैद्य 'किरण'या परिमार्जित राजनीतिक प्रतिवेदनदथुइ बिचाः तयेगु ज्या थौंनिसें न्ह्याःगु खः । मुँज्या कन्हय् सुथय् ८ बजे निसें हाकनं न्ह्याइगु प्रवक्ता शर्मापाखें पिथंगु विज्ञप्तीइ न्ह्यःथनातःगु दु ।
थ्वहे दथुइ अनमिनं प्रमाणित याःगु ल्वाभः लःल्हायेत सरकारं ब्यूगु निर्देशनया माओवादीं खण्डन याःगु दु । माओवादी मू ज्याकू पेरिसडाँडाय् सञ्चारकःमिपिंलिसे खँल्हानादिसें माओवादी प्रवक्ता दीनानाथ शर्मां वर्तमान कामचलाउ सरकारयात अज्याःगु अधिकार मदुगु लिसे सरकारी प्रस्ताव संविधान अःखः जूगु स्पष्ट यानादीगु खः ।
