न्हूगु प्रक्रियाय् वनेबलय् कांग्रेसं विकल्प बी : केसी
नेपाली कांग्रेसया केन्द्रीय दुजः अर्जुननरसिंह केसीं प्रधानमन्त्रीया न्हूगु निर्वाचन प्रक्रियाय् वनेबलय् पार्टीं विकल्प बिइगु खँ धयादीगु दु ।
रिपोर्टर्स क्लब नेपालं मंगलवाः ग्वसाः ग्वःगु साक्षात्कारय् ज्याझ्वलय् न्ववानादिसें वय्कलं न्हूगु प्रक्रियाय् कांग्रेसया नेतृत्व पलिस्था जुइसा कांग्रेस आःया नेतृत्वया विकल्प बिइत तयार दुगु स्पष्ट यानादीगु खः । वय्कलं धयादी - 'कांग्रेस दुने फुक्क विकल्प खुल्ला दु । अज्याःगु अवस्था वलधाःसा कांग्रेसं विकल्पय् सहलह याइ ।'
कांग्रेसं थ्व स्वयाः न्ह्यः प्रधानमन्त्रीया उम्मेदवार संसदीय दलया नेता जूगु हैसियतं स्वयाः नं केन्द्रीय कमिटीया सहमतिया आधारय् रामचन्द्र पौडेलयात दयेकाःगु न्ह्यःथनादिसें वय्कलं आः नं सहमतिइ हे न्हूम्ह प्रधानमन्त्रीया उम्मेदवार क्वःछीगु जानकारी बियादिल ।
शान्ति प्रक्रिया, न्हूगु संविधान दयेकेगु व सत्ता बाँडफाँडया विषयलय् प्याकेजं हे सहमति मयाःतले उम्मेदवारी लित मकायेगु स्पष्ट यानादिसें विपक्षय् बहुमत गाःसा कांग्रेस लोकतान्त्रिक पार्टी जूगुलिं उकीयात स्वीकार यानाः न्हूगु प्रक्रियाय् वनेगु नं वय्कलं स्पष्ट यानादिल । चक्रिय प्रणालीयात निरर्थक कुतःया संज्ञा बियादिसें वय्कलं दलतय्गु सत्ता मोहया उपज चक्रिय प्रणालीया प्रस्ताव वःगु दाबी नापं यानादिल ।
माओवादीयात निषेध यानाः देशय् हाकनं ल्वापु हयेत कांग्रेस तयार मदुगु धयादिसें लोकतान्त्रिक गठबन्धनयात निरन्तरता बियाः उकी हे माओवादीयात समाहित यानाः न्ह्यःने न्ह्यायेगु योजनाय् कांग्रेस दुगु जानकारी वय्कलं बियादिल ।
क्लबया नायः ऋषि धमलाया सभापतित्वय् जूगु साक्षात्कारय् एकीकृत नेकपा (माओवादी)या छ्याञ्जे सीपी गजुरेलं सेना समायोजन मजुइकं छु नं हालतय् सरकारयात माओवादीं ल्वाभः लःमल्हाइगु स्पष्ट यानादिल ।
वय्कलं धयादी - 'छगू प्रक्रियाय् थ्यंकेधुंकाः ल्वाभः लःल्हायेगु खः । छुं नं रोडम्याप बिना ल्वाभः माओवादीं लःलहाइ मखु ।'
अनमिनया ई तनेगु विषय संविधान सम्मत जूगु दाबी यानादिसें वय्कलं राजनीतिक तवरं उकिइ सहमति मजूसा थःगु पार्टी सर्वोच्च अदालतय् वनेगु जानकारी बियादिल । वय्कलं संवैधानिक विषय जूगुलिं सर्वोच्च अदालतं उकी थःगु निर्णय न्यंके हे माःगु बिचाः प्वंकादिल ।
न्हूगु सरकार दयेकेगु खँय् थःगु पार्टीं नं नेतृत्वया दाबी यायेगु धयादिसें छ्याञ्जे गजुरेलं पार्टी दुने पाखें नायः प्रचण्ड व न्वकु डा. बाबुराम भट्टराई बाहेकया नेतातय्सं नं नेतृत्व यायेफइगु धयादिल ।
'थ्व इलय् जिमिसं झलनाथयात समर्थन यायेगु वा सुयात उम्मेदवार दयेकेगु धइगु विषयसं निर्णय यानाःगु मदुनि । न्ह्याम्ह नं जुइफु । जिपिं उगु विषयसं खुल्ला दु । जिमिगु पार्टीं आःतक्क सुयात नं समर्थन यायेगु निर्णय याःगु मदुनि ।' छ्याञ्जे गजुरेलं धयादिल ।
