विश्व आर्थिक मन्दीया प्रभाव नेपालय् नं : रोहित
१२० क्वःगु अन्तर्राष्टि्रय श्रमिक दिवसया लसताय् ख्वपया टौमढी त्वालय् जूगु सभाय् नेमकिपाया केन्द्रीय अध्यक्ष व सभासद् नारायणमान बिजुक्छे रोहितं विश्वय् आर्थिक संकटया कारणं थीथी कारखानात बन्द जुया वनाच्वंगुया प्रभाव नेपालय् नं लायेधुंकूगु न्ह्यथसें आः हे देशय् मजदुरतय्त उचित ज्याला व उचित राहतया व्यवस्था मयात धाःसा निरन्तर आन्दोलन जुयाः वर्ग संघर्षयात ग्वाहालि हे जुइगु खँ कनादिल ।
नेमकिपाया केन्द्रीय सदस्य व विदेश विभाग प्रमुख प्रेम सुवालं उगु ज्याझ्वलय् ज्याला अप्वयेकेगु व ज्याया ई म्हो यायेगु संघर्षय् ताःलाःगु दिनय् हे थीथी थासय् मजदुरतय्त शोषण व अन्याय जुयाच्वंगु समाचार वःगुलिं देशय् माओवादी सरकारं नं मजदुर समस्या ज्यंके मफुगु स्पष्ट जूगु खँ कनादिल ।
नेक्रायुवा संघया केन्द्रीय अध्यक्ष व सभासद् जग्यबहादुर शाहीं संघीय लोकतान्त्रिक गणतान्त्रिक सरकार स्थापना जूगु दछि लिपा नं देशय् समस्या समाधान मजूगु खँ कनादिल । ज्याझ्वलय् सभासद् लीला न्याइच्याईनं म्हो आम्दानी दुपिं मिस्तय् सेवा यायेगु िनंितं त्वाःत्वालय् सरकारं शिशु स्याहार केन्द्र नीस्वनेमाःगु माग यानादिल ।
ज्याझ्वलय् नेपाल क्रान्तिकारी शिक्षक संघया केन्द्रीय अध्यक्ष चक्रबहादुर चाकतु नेपाल क्रान्तिकारी मजदुर संघया राजकृष्ण गोरा मजदुर प्रतिनिधि रिता दुमरुपिंसं नं श्रमिक दिवसया लसताय् थः थःगु नुगः खँ प्वंकेगुया नाप नापं भिन्तुना देछानादीगु खः ।
ज्याझ्वलय् आस्था सांस्कृतिक समुहपाखें म्ये व हुलाप्याखं न्ह्यब्वःगु खःसा सभा जुइ न्ह्यः च्याम्हिसंहं जुलुस नं पिकाःगु खः ।
