अनमिन लिहाँवनेधुंकाः संवैधानिक संकटय् : महरा

अनमिन लिछ्वयेगु नितिं भारतया ल्हाः

एकीकृत नेकपा माओवादीया विदेश विभाग प्रमुख कृष्णबहादुर महरां अनमिन लिहाँवनेधुंकाः संवैधानिक संकट पिज्वयेफूगु धयादीगु दु । अन्तरिम संविधानया अङ्ग जूगु अनमिन शान्ति प्रक्रिया लिच्वलय् मथ्यनेवं व सेना समायोजन न्ह्यः हे नेपाःपाखें वनेबलय् संवैधानिक संकट पिज्वयेफूगु वय्कःया शंका खः । क्रान्तिकारी पत्रकार संघं थौं घोराहीसं ग्वसाः ग्वःगु छगू पत्रकार नापलाये ज्याय् वय्कलं धयादी - 'अन्तरिम संविधानया अङ्ग जुइधुंकूगु अनमिन नेपाःपाखें वनेबलय् संवैधानिक संकट पिज्वयेफूगुपाखे दलतय्सं ध्यान बिइमाः ।' शान्ति प्रक्रिया लिच्वलय् मथ्यंक अनमिन लिछ्वयेगुया ल्यूने भारतया ल्हाः दुगु वय्कलं दाबी नापं यानादीगु दु ।

'थ्व स्वयाः न्ह्यः अनमिनया ई तनेत सरकारी पतिइ लिपांगु प्यलाया नितिं न्ह्यथनातःगु व उगु हे आधारय् राष्ट्रसंघं अनमिनया ई लिपांगु खुसिइ तनेगु ज्या जूगुलिं पुस मसान्ततक्क अनमिन लिहाँ वनी,' महरां धयादीगु दु, 'अनमिनयात नेपाःपाखें छ्वयेत भारतया तःधंगु ल्हाः दु ।' अनमिनयात बिदा बिइधुंकाः नेपाःया शान्ति प्रक्रियायात गुकथं न्ह्यःने न्ह्याकेगु धइगु बिषयलय् दलतदथुइ सहलह न्ह्यानाच्वंगु जानकारी बियादिसें वय्कलं अनमिन लिहाँवंसां नं राष्ट्रसंघया इकाई नेपालय् तयेमाःगु धयादीगु दु । उगु इकाईं ल्वाभः व सेनाया अनुगमन यायेमाःगु वय्कःया धापू खः ।

कांग्रेस व एमालें बहुमत हःसा माओवादी प्रतिपक्षय् च्वनेगु वय्कलं जानकारी नापं बियादीगु दु । जेठ १४ गतेतक्कयादुने संविधान दयेकीगु खँय् शंका प्वंकादिसें वय्कलं आन्दोलनपाखें दुगु उपलब्धी तनीगु ग्याःचिकु दुसा जनतां विद्रोह याइगु व उकिया नेतृत्व माओवादीं यायेगु नापं धयादीगु दु । माओवादीदुनेया आन्तरिक कचवंबारे पत्रकारया न्हय्सलय् वय्कलं पार्टीदुने न्ह्याइगु बहस व सहलहपाखें पार्टीयात अझ छधी दयेकीगु विश्वास प्वंकादीगु दु । थःपिंसं शहर व मधेशय् पार्टी संगठनयात सुदृढ यायेत न्हूगु योजना न्ह्यःने न्ह्याकाःगु न्ह्यथनादिसें नेता महरां मधेसय् नेतृत्व विकासया खँयात प्राथमिकतालिसे न्ह्यःने न्ह्याकेगु जानकारी नं बियादीगु दु ।