शान्ति व संविधानया नितिं कांग्रेस-एमाले सरकार'
येँ (सन्ध्या टाइम्स)/वर्तमान कामचलाउ सरकारया सिंचाइमन्त्री बालकृष्ण खाँडं एकीकृत माओवादीया नेतृत्वय् सरकार गठन जुइ फइमखु धासें शान्ति व संविधानया नितिं कांग्रेस व एमालेया गठबन्धनय् बल्लाःगु सरकार दयेमाः धयादीगु दु ।
कांग्रेस नेता खाँडं थःपिनि पार्टीया संसदीय दलया नेता रामचन्द्र पौडेलया उम्मेदवारी राष्ट्रिय सहमतिया सरकारया नितिं खः धयादिल। प्रस युनियन चितवनं थौं सुथय् सौराहय् याःगु पत्रकार सम्मेलनय् वय्कलं गुगुं नं हालतय् पौडेलया उम्मेदवारी लित मकायेगु खँ नं धयादिल ।
रामचन्द्रया विकल्प मदुगु हे खः ला धकाः पत्रकारतय्सं न्यंगु न्ह्यसःया लिसः बीगु झ्वलय् वय्कलं पौडेल निर्विकल्प धाःसा मखु तर आःया हे अवस्थाय् उम्मेदवारी लित कायेगु जुइ मखु धकाः नं धयादिल। माओवादी लोकतान्त्रिक मूल्य मान्यता कथं न्ह्याः वनाच्वंगु मदु धकाः दावी यानादिसें मन्त्री खाँडं आःया हे अवस्थाय् माओवादी नेतृत्वया सरकार सम्भव हे मदु धकाः नं धयादिल ।
माओवादीया व्यवहार भिनावःगु थें जूसां बास्तवय् वयागु रणनीति न्हापा थें हे जुयाच्वंगु दु धयादिसें वय्कलं धयादिल, 'माओवादीया नतृत्वय् तत्काल हे सरकार दयेकेगु खँय् जिपिं सहमत मदु, लडाकु समायोजन व लोकतान्त्रिक संविधान दयेकेगु खँय् माओवादीं प्रतिबद्धता प्वंकेमाः ।'
