पर्यटन वर्षया निंतिं जनस्तरं ज्याझ्वः
थुगुसी न्हूदँ २०११ निसें शुरु जूगु पर्यटन वर्षयात ताःलाकेगु ताः तयाः म्हिगः बसन्तपुली जनस्तरं हे छगू विशेष ज्याझ्वः जुल। स्थानीय लकस म्हालासाला पुचः, ग्रिन स्क्वायर टुरिजम् काउन्सिल, झोछेँ सामुदायिक टोल सुधार समति व ओलम्पस क्लबया ग्वसाः व नेपाल स्काउट येँ जिल्लाया संयोजनय् मरुया महाद्यः पार्वती दबुली याःगु उगु ज्याझ्वलय् पुलांम्ह पर्यटन मन्त्री हिसिला यमि मूपाहां कथं झाःगु खः ।
ज्याझ्वलय् नेपाः चाःहिलेगु झ्वलय् बसन्तपुली दुहां वःपिं विदेशी पर्यटकतय्त करिब सत्यागः रिक्साय् तयाः बसन्तपूर, न्हूसतक लागा चाःहीकेगु ज्या नं याःगु खः। लिसें उमित नेवाः परम्परा कथं ख्यें सगं बियाः हनेगु ज्या नं याःगु खः ।
वयां लिपा अन छगू तःजिगु सांस्कृतिक ज्याझ्वः नं याःगु खः। उगु ज्याझ्वलय् वज्र कला कुञ्जपाखें थीथी चचा प्याखं नं न्ह्यब्वयेगु ज्या जूगु खः ।
अथे हे ओमबाहाःया त्वाः खलः पाखें ज्यापु जातिय धुन्या ब्वज्या याःगु खःसा लाखे प्याखं नं क्यंगु खः। उगु ज्याझ्वलय् पर्यटन वर्ष आरम्भया संकेत कथं ग्वसाः खलकय् दुथ्याःगु पुचःया नायःतय्सं पर्यटन वर्ष धकाः च्वयातःगु बेलुन ब्वयेकूगु खः। अथे हे शान्ति प्रतिक बेलुन नं ब्वयेकूगु खः ।
ज्याझ्वलय् मूपाहां हिसिला यमि नापं पवित्र वज्राचार्य, गणेशलाल श्रेष्ठ आदिपिंसं न्ववानादीगु खः ।
