कार्यकारी अधिकृत मवयाः ख्वप नपा ठप्प
ख्वप (सन्ध्या टाइम्स)/ख्वप नगरपालिकाय् आः तकं कार्यकारी अधिकृत छ्वया महःगु खँय् अनया कर्मचारीत आक्रोशित जूगु दु। कार्यकारी अधिकृत जुयाच्वंम्ह विन्दुप्रसाद गुरागाइँ स्ववाः न्ह्यःनिसें मवःसां न्हूम्ह कार्यकारी अधिकृत छ्वया महःगुलिं नगरपालिकाया विकास निर्माण व सर्वसाधारण जनताया ज्या नापं ठप्प जुयाच्वंगु दु। गुरागाइँ मंसीर १९ गते हे रमाना कयाः बारा जिविसय् वनेधुंकूगुलिं आः वय्कः लिहां वइगु अवस्था मदुगु खँ धाःगु दु ।
कार्यकारी अधिकृत छ्वया महःगु खँय् अनया कर्मचारी संगठनया अध्यक्ष गौतमप्रसाद लासिवाया नेतृत्वय् स्थानीय विकास मन्त्रालयय् वनाः सहसचिव रेश्मीराज पाण्डेलिसे सहलह यानाः ज्ञापनपत्र नं बिया थकूगु दु। डेलिगेशनया झ्वलय् सहसचिव पाण्डें निन्हु स्वन्हुया दुने हे ख्वप नगरपालिकाया लागिं इमान्दार व कर्तब्यनिष्ट कार्यकारी अधिकृतया बन्दोबस्त यानाबीगु बचन बियादीगु खः ।
