शंखधर सिरपाः लःल्हात
थिमि (सन्ध्या टाइम्स)/नेपाः व विश्वन्यंकं नेपाल संवत्या प्रचार प्रसार यायेगु ज्याय् तःजिगु योगदान याना वयाच्वंगु सिन्हःस्वां खलः व नेपालमण्डल डट कमयात नेपाल संवत् ११३० व ११३१ या शंखधर सिरपाः लःल्हात। म्हिगः नगदेशया श्रीगणेश माविइ जूगु छगू ज्याझ्वःया दथुइ सिन्हःस्वां खलःया संरक्षक मनोज नेवाः खड्गी व नेपालमण्डल डट कमया जुजुमान महर्जनयात शंखधर सिरपाः समितिया नायः पद्मरत्न तुलाधरं दां सिरपाः व दसिपौ लःल्हानादीगु खः ।
भाजु पद्मरत्न तुलाधरया हे सभापतित्वय् जूगु उगु ज्याझ्वलय् मूपाहां नापं इतिहासकार जगदिशचन्द्र रेग्मीं नेपाल संवत्या ऐतिहासिक पक्षयात कयाः न्ववानादीगु खः। अथे हे नेवाः देय् दबूया संरक्षक लक्ष्मण राजवंशी, च्वमि छत्रबहादुर कायस्थ व समितिया दुजः डा. पुष्पराज राजकर्णिकारं नं नेपाल संवत्या बारे बिचाः प्वंकादीगु खः।
उगु हे ज्याझ्वलय् भाजु तुलाधरं सिक्किमया करुणादेवी स्मारक धर्मार्थ गुथिपाखें पिकाःगु भाजु दया शाक्यं च्वयादीगु 'नेवाः भाय् लर्नर्स' नांगु सफू व 'नेवार्स इन सिक्किम' नांगु वेबसाइट नं विमोचन यानादीगु खः। उगु वेबसाइट सिक्किमया भाजु राजीवशंकर श्रेष्ठया कुतलय् तयार जूगु खः ।
ज्याझ्वलय् शंखधर सिरपाः समितिया छ्यांज्ये गणेशराम लाछिं लसकुस यानादीगु खः ।
