न्यायप्रणाली व मौलिक हकय् दलतदथुइ कचवं
शासकीय स्वरुप व व्यवस्थापिकाबारे उच्चस्तरीय कार्यदलं याःगु सहमतियात संविधानसभाया नीच्यागू दलं अनुमोदन याःगु दु । सिंहदरबारस्थित राज्य व्यवस्था समितिया ज्याकुथिइ थौं च्वंगु नीच्यागू दलया मंकाः बैठकं कार्यदलया सहमतियात अनुमोदन याःगु खः ।
न्यायप्रणाली व मौलिक हकया विषयसं धाःसा दलतदथुइ खँ क्वःजिइफूगु मदुनि । बैठकलिपा एकीकृत नेकपा माओवादीया नेता देव गुरुङ्गं न्यायप्रणाली व मौलिक अधिकार अन्तर्गतया नागरिकताया विषयसं सहलह जूसां नं सहमति जुइमफूगु जानकारी बियादिल ।
नेकपा एमालेया मू सचेतक भीम आचार्यं सहलह सकारात्मक जूगु व कन्हय् हाकनं च्वनीगु बैठकय् सहमति जुइगु विश्वास प्वंकादीगु खः । उच्चस्तरीय कार्यदल भङ्ग जुइधुंकाः संविधानसभाय् प्रतिनिधित्व याइगु दलत हे संविधानया विवादित विषय ज्यंकेत सक्रिय जूगु दु ।
संविधानसभाय् थ्व स्वयाः न्ह्यः नीन्हय्गू दल दुसां नं तराई मधेश लोकतान्त्रिक पार्टीपाखें बिभाजित तराई मधेश लोकतान्त्रिक पार्टी नेपालं नं थौंया बैठकय् ब्वति क्यंगु खः । तमलोपा नेपाल संसद सचिवालयसं दर्ता जुइधुंकाः नेपालय् दलतय्गु ल्याः नीच्यागू थ्यंगु दु ।
