अन्ततः माओवादीया साहसिक निर्णय

नेपाःया आःतकया इतिहासय् हे न्हापांखुसी 'बडे भैंया' भारतं धाःगु खँयात वास्ता मयासे एकीकृत नेकपा (माओवादी)या सरकारं छुं ज्या यानाः क्यंगु दु । प्रधानसेनापति रुक्मांगद कटवालयात चीके हे दइ मखु धकाः भारत लगायत अमेरिका व मेगु छुं पश्चिमेली देय्तय्सं याःगु 'इनाप'यात लाकमं च्वानाः माओवादीं म्हिगः सेनापति कटवालयात पदं चीकेगु दुसाहसपूर्ण निर्णय यानां तुं त्वःतल । माओवादीया थ्व निर्णयं राष्ट्रिय जक मखु अन्तर्राष्ट्रिय ख्यलय् तकं तःधंगु तरंग ब्वलंका बिउगु दु । माओवादीया थ्व निर्णययात विगतय् भारतीय दलाल व राष्ट्रघातीया द्वपं लानाच्वंगु राजनीतिक पार्टीतय्सं कडा रुपं विरोध याःसां राष्ट्रवादी आन्दोलनया सम्पूर्ण न्ह्यलुवाःतय्सं धाःसा मुक्तकण्ठं लसकुस याःगु दु । थ्व ल्याखं स्वयेबलय् माओवादीं काःगु थ्व निर्णयया अन्तिम लिच्वः न्ह्यागु हे जूसां नेपाःया राष्ट्रवादी आन्दोलनय् थ्व छगू ऐतिहासिक कोशल्वहं जुइगु खँय् धाःसा सन्देह मदु । थ्व पलाः लिपा आः भारतं छु याइ धइगु न्ह्यसः नं वःगु दु ।

माओवादीं काःगु थ्व निर्णय लिपा आः देशय् छु जुइ फुकसिया म्हुतुइ थ्वहे न्ह्यसः व मनय् थ्वहे उत्सुकता दु । राष्ट्रपितं थुकियात अनुमोदन याइ लाकि याइ मखु ? आः माओवादीया सरकार क्वःदली लाकि क्वःदली मखु ? प्रधानसेनापति पुलांम्ह हे कायम जुइ लाकि न्हूम्ह कायम जुइ ? थुपिं यावत् न्ह्यसःया लिसः आः थथें वइगु सम्भावना मदुनि । थ्व फुक्कं जुइ नं फु मजुइ नं फु । थुकिया निंतिं छन्हु-निन्हु पियाः हे स्वयेमालीगु स्थिति दु । अथे खःसां थ्व पलाःयात राष्ट्रवादी मिखां स्वयेगु छगू प्रमुख आयाम धाःसा अवश्य खः ।

More Stories Like this