अन्मिनया ई तनेमाःगु : कांग्रेस नेता थापा
नेपाली कांग्रेसया नेता विमलेन्द्र निधिं आः दयाच्वंगु सरकारय् दुथ्यानाच्वंगु दलया सहमतिइ न्हूगु सरकार दयेकेमाःगु खँ धयादिल ।
प्रेस युनियन कास्कीं थौं ग्वसाः ग्वःगु छगू ज्याझ्वलय् न्ववानादिसें नेता निधिं सहमति व विश्वासया नापं न्ह्यज्यायेमाःगु खँ धयादिल । वय्कलं प्रधानमन्त्रीया छम्ह जक उम्मेदवार रामचन्द्र पौडेलया नेतृत्वय् हे न्हूगु सरकार दयेकेमाःगु खँय् बः बियादिल ।
थ्वहे दथुइ बाग्लुङय् ग्वसाः ग्वःगु छगू ज्याझ्वलय् न्ववानादिसें नेपाली कांग्रेसया युवा केन्द्रीय दुजः गगन थापां अन्मिनया म्याद तनेमाःगु बिचाः प्वंकादिल ।
वर्तमान सरकारं अन्मिनया ई मतनेगु क्वःछिनाच्वंगु इलय् सरकार दुथ्यानाच्वंगु दल नेपाली कांग्रेसया केन्द्रीय दुजः गगन थापाया उगु अभिव्यक्ति पिहांवःगु खः ।
अन्मिनया ई निला जकसां तनेमाःगु खँ धयादिसें युवा नेता थापां शान्ति प्रकृयायात निष्कर्षय थ्यंकेत अन्मिनया आवश्यकता जूगु खँ धयादिल ।
