तमलोपा नं तज्यात
येँ (सन्ध्या टाइम्स)/वर्तमान सरकारय् दुथ्याःगु तराई मधेश लोकतान्त्रिक पार्टी (तमलोपा) नं तज्यात ।
उगु पार्टीया २१ म्ह सांसद मध्ये बहुमत सांसदतय्सं पार्टी तछ्यानाः न्हूगु पार्टी दयेकेगु नितिं तयारी याःगु खः। तमलोपाया महामन्त्री नापं उद्योगमन्त्री महेन्द्र राय यादवया नेतृत्वय् ११ म्ह सभासद्तय्सं उगु पार्टी त्वःतूगु खँ सीदुगु दु ।
इमिसं थौं जक संविधानसभाया अध्यक्ष सुवासचन्द्र नेम्वाङयात नापलानाः न्हूगु पार्टी दयेकेगु प्रक्रिया नापं संसदीय दल दर्ताया बारे परामर्श याःगु दु ।
तमलोपां मधेशया मागयात बेवास्ता याना वनाच्वंगु नापं पार्टी अध्यक्ष महन्थ ठाकुर नाप असन्तुष्ट जूगुलिं थःपिंसं पार्टी परित्याग यानागु खँ धाःगु दु। उगु पार्टीया नेता लिसें पुलांम्ह मन्त्री महेन्द्र राय यादव नापं ११ म्ह सांसदत पिहां वनेवं आः संस्थापन पक्षयाके मुक्कं १० म्ह जक सांसद ल्यं दनि। न्हूगु पार्टीया नां तमलोपा (नेपाल) तइगु खँ नं धाःगु दु ।
